ކްރިމިނަލް ކޯޓުގެ މުވައްޒަފަކު ކޮވިޑަށް ޕޮޒިޓިވްވުން ވަގުތީގޮތުން ޝަރީއަތްތައް މެދުކަނޑާލައިފި

ކްރިމިނަލް ކޯޓުގެ މުވައްޒަފެއް ކޮވިޑް-19 އަށް ޕޮޒިޓިވް ވުމާ ގުޅިގެން ކޯޓު ޑިސްއިންފެކްޓް ކުރުމަށްޓަކައި ކޯޓުގެ ޝަރީއަތުގެ އަޑުއެހުންތައް ވަގުތީގޮތުން މެދުކަނޑާލަން ނިންމައިފި އެވެ.

އެކަމާ ގުޅިގެން ކްރިމިނަލް ކޯޓުން މިއަދު ނެރުނު ބަޔާނެއްގައި ބުނެފައިވަނީ ކޯޓު ޑިސްއިންފެކްޓު ކުރުމަށްޓަކައި މިއަދާއި މާދަމާގެ އަޑުއެހުންތައް ކެންސަލުކޮށްފައިވާ ކަމަށެވެ.

އެނގިފައިވާ ގޮތުން ކޮވިޑަށް ޕޮޒިޓިވްވެފައި ވަނީ އެ ކޯޓުގައި މަސައްކަތް ކުރާ ލީގަލް އޮފިސަރެކެވެ. އަދި މިހާރު ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގާފައި ވަނީ އެ މުވައްޒަފާ ޑައިރެކްޓް ކޮންޓެކްޓްވީ މީހުން މިވަގުތު ހޯމް ކަރަންޓީނުގައި ތިބުމަށެވެ.

ކްރިމިނަލް ކޯޓުން ބުނެފައިވަނީ ކޮވިޑް-19 އަށް މުވައްޒަފެއް ޕޮޒިޓިވްވި ނަމަވެސް ގިނަ މުވައްޒަފުންތަކެއް ކަރަންޓީނު ކުރަން ނުޖެހޭގޮތަށް ކޯޓުގެ މަސައްކަތް ވަނީ ރޭވިފައި ކަމަށެވެ.

އެ ދެދުވަހު ކޯޓު ހުޅުވައިގެން ހިދުމަތް ނުދެވުނު ނަމަވެސް ބަންދާ މެދު ގޮތެއް ނިންމުމުގެ އަޑުއެހުންތަކާއި ތަހުގީގުކުރާ އިދާރާތަކުން އެކި ކަންކަމަށް ބޭނުންވާ އަމުރު ނެރުމުގެ މަސައްކަތައް މެދުކެނޑުމެއް ނެތި ކުރިއަށް ގެންދާނެ ކަމަށް ކޯޓުން ވަނީ ބުނެފައެވެ.