ޗައިނާއިން ނަގާފައިވާ ލޯނުތައް ހަތަރު ވަރަކަށް އަހަރަށް ފަސްކޮށްދޭނެ: ރައީސް

ޗައިނާއިން ނަގާފައިވާ ލޯނުތައް ހަތަރު ވަރަކަށް އަހަރަށް ފަސްކޮށްދޭން އެއްބަސްވެފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ

ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ހަތަރު ވަރަކަށް އަހަރަށް ފަސްކޮށްދޭން މިހާރު އެއްބަސްވެފައި ވަނީ ސީދާ ދިވެހި ސަރުކާރުން ޗައިނާ ސަރުކާރަށް ދައްކަން ޖެހޭ ލޯނުތައް ކަމަށާއި އެއީ 600 ވަރަކަށް މިލިއަން ޑޮލަރު ކަމަށް ރައީސް ވިދާޅުވި އެވެ.

މީގެ އިތުރުން އެޗްޑީސީ ފަދަ ކުންފުނިތަކަށް ސަރުކާރުން ސޮވެރިން ގެރެންޓީ ދީގެން ނަގާފައިވާ ލޯނުތައްވެސް އެބަހުރި ކަމަށާއި އެ ލޯނުތަކާ މެދު ލުއި ގޮތްތަކެއް ހެދުމަށްޓަކައި މަޝްވަރާ ކުރަން ތައްޔާރު ކަމަށް ޗައިނާގެ ސަފީރު ވިދާޅުވެފައިވާ ކަމަށްވެސް ރައީސް ވިދާޅުވި އެވެ.

ޗައިނާ ސަރުކާރުން ނަގާފައިވާ ޖުމްލަ ލޯނުގެ އަދަދު 1.5 ބިލިއަން ޑޮލަރަށް އަރަ އެވެ. ރާއްޖެއިން ދައްކަން ޖެހޭ ދަރަނީގެ 45 ޕަސެންޓް ދައްކަން ޖެހެނީ ވެސް ޗައިނާއަށެވެ.

މި އަހަރު ޗައިނާ ސަރުކާރަށް ދައްކަން އޮތީ 100 މިލިއަން ޑޮލަރު ކަމަށާއި ޖީ20 ގައުމުތަކުން ވެފައިވާ އެއްބަސްވުމުގެ ދަށުން ޗައިނާ އަށް ދައްކަން ޖެހޭ 25 މިލިއަން ޑޮލަރު މި އަހަރު ދައްކަން ނުޖެހޭނެ ކަން ރައީސް ފާހަގަ ކުރެއްވިއެވެ. އެހެންކަމުން މި އަހަރު ސަރުކާރުން ޗައިނާއަށް ދައްކަން ޖެހޭނީ 75 މިލިއަން ޑޮލަރެވެ.

ރާއްޖޭން އެކްސްޕޯޓް-އިމްޕޯޓް ބޭންކް އޮފް ޗައިނާ އާއި އިންޑަސްޓްރިއަލް އެންޑް ކޮމާޝަލް ބޭންކް އޮފް ޗައިނާ އާއި ޗައިނާ ޑިވަލޮޕްމެންޓް ބޭންކުން ނަގާފައިވާ ލޯނުތައް ހިމެނެ އެވެ.

މި އަހަރު ނިމޭ އިރު ރާއްޖޭގެ އުފެއްދުންތެރިކަމުގެ ނިސްބަތުން ދަރަނީގެ މިންވަރު 79 ޕަސެންޓަށް އަރާނެ ކަމަށް ވޯލްޑް ބޭންކުން ލަފާކުރެ އެވެ. މީގެ އިތުރުން ދައުލަތުގެ ދަރަންޏާއި ދައުލަތުން އެކި ލޯންތަކަށް ދީފައިވާ ގެރެންޓީއާ އެކު ދަރަނީގެ މިންވަރު އުފެއްދުންތެރިކަމުގެ ނިސްބަތުން ހުންނާނީ 93.8 ޕަސެންޓްގައި ކަމަށް ވެސް ވޯލްޑް ބޭންކުން ބުނެ އެވެ.