އެމްޑީއެންގެ ރިޕޯޓަށް އުތެމައިން ތާއީދު ކުރުމުން އެކަން އުތީމު ކައުންސިލުން ކުށްވެރިކޮށްފި

މޯލްޑިވްސް ޑިމޮކްރެސީ ނެޓްވޯކް (އެމްޑީއެން) އިން "ޕްރެލިމިޓަރީ އެސެސްމެންޓް އޮފް ރެޑިކަލައިޒޭޝަން އިން ދަ މޯލްޑިވްސް" ގެ ނަމުގައި ކީރިތި ރަސޫލާއަށާއި އިސްލާމްދީނަށް ފުރައްސާރަކޮށް ނެރުނު ރިޕޯޓަށް ރާއްޖޭގައި ހިންގާ މަދަނީ ޖަމިއްޔާއެއް ކަމަށްވާ އުތެމަ ޖަމިއްޔާއިން ތާއީދުކުރުމުން އެކަން ހއ އުތީމު ކައުންސިލުން ހަރުކަށި އިބާރާތުން ކުށްވެރިކޮށްފި އެވެ.

މިއަދު އެ ކައުންސިލުން ނެރުނު ރިޕޯޓުގައި ބުނެފައިވަނީ އުތެމައިން ޖޫން 22 ން ޖުލައި މަހުގެ 10 އަށް ޖެނީވާގައި އޮންނަ ސީޑޯ ކޮމިޓީގެ 76 ވަނަ ބައްދަލުވުމަށް ހުށައަޅާ ރިޕޯޓުގައި އެންޑީއެންގެ ރިޕޯޓު ބަލައިގަނެ އެ ރިޕޯޓުގައި ފާހަގަކޮށްފައިވާ ދިނީ ގޮތުން ހައްދު ފަހަނަ އަޅައިދިއުމުގެ ނުރައްކާތެރިކަމުގެ މައްޗަށް ހަގީގަތާ ހިލާފަށް އެކުލަވާާފައިވާ ކަންކަން ބަލައިގަނެ އެކަންކަމާއި ދޭތެރޭގައި ފިޔަވަޅު އެޅުމަށް ގޮވާލާފައިވުމަކީ ބިރުވެރި އެހާމެ ނުރަައްކާތެރި ކަމެއް ކަމަށެވެ.

މީގެ އިތުރުން އެމްޑީއެންގެ ރިޕޯޓާއި ގުޅިގެން އެއްވެސް ފަރާތަކަށް ފިޔަވަޅު އަޅާފައި ނުވުމަކީ ރައްޔިތުން ކަންބޮޑުވާ ކަމަަކަށް ވެފައިވަނިކޮށް މިހާރު ފެނިގެން ދަނީ އެޖަމިއްޔާގެ ނަމުގައި ބަރާބަރަށް މަސައްކަތްކޮށް ހަރަކާތްތައް ހިންގާތަން ކަމަށާއި އަދި ރިޕޯޓަށް ތާއީދުކޮށް އެފަދަ އެހެން ޖަމިއްޔާތައް އުފައްދައިގެން މަސައްކަތް ކުރަމުންދާތަން ކަމަށްވެސް ބަޔާނުގައި ބުނެފައި ވެއެވެ.

އަދި އެމްޑީއެންގެ ރިޕޯޓު ތަހުގީގުކުރި އުސޫލުން އުތެމަ ރިޕޯޓު ތަހުގީގުކޮށް އެކަމުގައި ޝާމިލްވާ ފަރާތްތަކާ މެދު ގާނޫނީ ފިޔަވަޅު އެޅުމަށްވެސް ބަޔާނުގައި ވަނީ ގޮވާލާފައެވެ.

އެމްޑީއެންއިން ނެރުނު ރިޕޯޓާއި ގުޅިގެން ރާއްޖޭގެ ގިނަ ރަށްރަށުގައި ރިޕޯޓާއި ދެކޮޅަށް ވަނީ އަޑު އުފުލާ އިހްތިޖާޖުކޮށްފައެވެ. އެއާއެކު ސަރުކާރުން ވަނީ އެ ޖަމިއްޔާ 2019 ޑިސެންބަރު 19 ވަނަ ދުވަހު އުވާލިކަން އިއުލާންކޮށްފަ އެވެ. އެހެންނަމަވެސް ރިޕޯޓާއި ގުޅިގެން އެ ޖަމިއްޔާގެ އެއްވެސް މެންބަރަކަށް މިހާތަނަވެސް ފިޔަވަޅެއް އަޅާފައެއް ނުވެއެވެ.