ޑަބްލިއުއެޗްއޯއިން ރާއްޖެއަށް ގިނަ އަދަދެއްގެ މެޑިކަލް ސާމާނު ހަދިޔާކޮށްފި

ރާއްޖެއިން ކޮވިޑް-19 އާއި ދެކޮޅަށް ކުރަމުންގެންދާ މަސައްކަތްތަކަށް އެހީތެރިވެ ދިނުމުގެ ގޮތުންނާއި، ސިއްހީދާއިރާ އިތުރަށް ހަރުދަނާކުރުމަށް ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯއިން ރާއްޖެއަށް ބައެއްތަކެތި ރަސްމީކޮށް ހަވާލު ކޮށްފިއެވެ.

ޑަބްލިޔުއެޗްއޯއިން ރާއްޖެއަށް ހަވާލުކުރި ތަކެތީގެ ތެރޭގައި އައި.ސީ.ޔޫ އެނދާއި އައި.ސީ.ޔޫ ގާއިމްކުރުމަށް ބޭނުންވާ އާލާތްތަކާއި ބޭހުގެ އިތުރުން، މެޑިކަލް ލެބޯޓްރީތަކަށް ބޭނުންވާ ތަކެއްޗާއި 10،000 ކޮވިޑް-19 ޓެސްޓިންގ ކިޓް ހިމެނެއެވެ.

މިތަކެތި ހަވާލުކުރީ މިކަމަށް ޓަކައި މިނިސްޓްރީ އޮފް ހެލްތުގައި ބޭއްވި ރަސްމިއްޔާތެއްގައެވެ. މިތަކެތި މިނިސްޓަރ އޮފް ހެލްތާއި ހާވާލުކޮށް ދެއްވީ ދުނިޔޭގެ ސިއްހަތު ޖަމިއްޔާއިން ދިވެހިރާއްޖެއަށް ކަނޑައަޅުއްވާފައިވާ މަންދޫބު ޑރ. އަރުވިންދު މާތުރުއެވެ.

Ministry of Health received medical & diagnostic items from @WHO, including ICU equipment and 10,000 #COVID__19 test kits.@WHOMaldives @HPA_MV pic.twitter.com/1wDEKtKOLw

— Ministry of Health (@MoHmv) July 11, 2020

އެ ރަސްމިއްޔާތުގައި ޑރ. މާތުރު ވަނީ ކޮވިޑް-19 ދުނިޔޭގައި އަދިވެސް ހަލުވިކަމާއިއެކު ފެތުރެމުންދާކަން ފާހަގަކުރައްވައި، ރާއްޖޭގައި މި ބަލި ކޮންޓްރޯލްކުރުމަށް ސިއްހީ އިދާރާތަކުން ދޭ އިރުޝާދުތަކާއި އެއްގޮތަށް ރައްޔިތުންގެ އަމަލުތައް ބެހެއްޓުމަށް ގޮވާލައްވާފަ އެވެ.

ރާއްޖޭގެ އެކި ކަންކޮޅުތަކުގައި ކޮވިޑް19އަށް ޓެސްޓު ކުރެވޭނެ އިންތިޒާމުތައް ހަމަޖެއްސުމަށް ސަރުކާރުން ކުރަމުންދާ މަސައްކަތަށް ވެސް އެ ޖަމިއްޔާއިން ވަނީ އެހީތެރިކަން ފޯރުކޮށްދީފަ އެވެ.