އުސޫލުތަކަށް އަމަލުނުކުރާ ހުރިހާތަނެއް ބަންދުކުރަނީ

ކޮވިޑް-19އިން ރައްކާތެރިވުމުގެ ގޮތުން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ އުސޫލާ ހިލާފުވާ ހުރިހާ ތަނެއް މިއަދުން ފެށިގެން ބަންދު ކުރަން އެޗްޕީއޭ އިން ނިންމައިފި އެވެ.

އެޗްޕީއޭއިން ރޭ ކުރި ޓުވީޓެއްގައި ބުނީ ގައިޑްލައިންތަކާ އެއްގޮތަށް މަސައްކަތް ކުރޭތޯ ބަލަން މިއަދު ހެލްތު އިންސްޕެކްޝަން ހަރަކާތެއް ފަށާނެ ކަމަށެެވެ.

📢 A follow-up of the mass public health inspection will initiate tomorrow in greater Male’ area

As before, we will be inspecting adherence to #COVID19 safety guidelines of cafés & restaurants, shops, gyms & fitness centers, salons and markets

— Health Protection Agency (@HPA_MV) July 28, 2020

ކޮވިޑް-19 އިން ރައްކާތެރިވުމުގެ ފިޔަވަޅުތަކަށް ދިން ބޮޑު ލުޔާ އެކު، "ނިއު ނޯމަލް" ގެ ހާއްސަ އުސޫލުތަކެއް އެޗްޕީއޭ އިން ކަނޑައަޅާފައިވެ އެވެ. އެގޮތުން ކެފޭ/ރެސްޓޯރަންޓުތަކުގައި މީހުން ތިބެން ޖެހޭނެ ގޮތާއި ފިހާރަތަކަށް ގިނަ ވެގެން ވަދެވޭނެ މީހުންގެ އަދަދުތައް ފަދަ ބައެއް އުސޫލުތައް ކަނޑައަޅައި އެ ތަންތަނުން އަމަލުކުރަން ޖެހޭނެ ގޮތްތައް އެޗްޕީއޭ އިން އާންމުކޮށްފައިވެ އެވެ.

މީގެ ކުރިން މާލޭ ސިޓީ ކައުންސިލްއާއި އެޗްޕީއޭ އަދި އެހެނިހެން އިދާރާތައް ގުޅިގެން އާންމު ހިދުމަތްދޭ ތަންތަން ނިއު ނޯމަލްގެ އުސޫލުތަކަށް އަމަލު ކުރޭތޯ ބެލުމަށް ގެންދިޔަ އިންސްޕެކްޝަންގައި 1475 ތަނެއް ބެލިއެވެ. އޭގެ ތެރެއިން ގިނަ ތަންތަން ނިއު ނޯމަލްގެ އުސޫލުތަކަށް ފެތޭކަމަށް މާލޭ ސިޓީ ކައުންސިލްއިން މީގެ ކުރިން ބުނެފައިވެއެވެ.

ހެލްތު އިންސްޕެކްޝަންގެ ހަރަކާތެއް އަނެއްކާވެސް ފަށަން ނިންމިއިރު އިއްޔެ ރިކޯޑު އަދަދަކަށް ކޮވިޑަށް މީހަކު ވަނީ ޕޮޒިޓިވްވެފައެވެ. އޭގެ ތެރޭގައި 92 ދިވެހީން ހިމެނެއެވެ.