ޔުނިވާސަލް އެންޓަޕްރައިސަސްގެ ފަރާތުން ކޮވިޑް ޓެސްޓް ހެދުމަށް ބޭނުން ކުރާ ދެ ޕީސީއާރު މެޝިން ހެލްތު މިނިސްޓްރީ އަށް ހަދިޔާކޮށްފި އެވެ.
މިއީ އަމިއްލަ ފަރާތަކުން ޕީސީއާރް ޓެސްޓް މެޝިން ހަދިޔާ ކުރި ފުރަތަމަ ފަހަރެވެ. މީގެ ކުރިން ވެސް އެކި އަމިއްލަ ފަރާތްތަކުން ކޮވިޑް-19ގެ މި ހާލަތުގައި ޕީޕީއީ ކިޓްތަކާއި، ޓެސްޓު ކިޓްތަކުގެ އިތުރަށް ވެންޓިލޭޓަރު ވެސް ހަދިޔާކޮށްފައިވެ އެވެ.
މިއީ ކޮވިޑާ ދެކޮޅަށް ރާއްޖެއިން ކުރަމުންގެންދާ މަސައްކަތްތަކުގެ ތެރެއިން ލެބޯޓްރީ ޓެސްޓުކުރުން އިތުރަށް ހަރުދަނާކުރުމުގެ މަސައްކަތަށް އެހީތެރިވުމުގެގޮތުން އެ ކުންފުނިން ވެދިން އެހީތެރިކަމެއް ކަމަށް ހެލްތު މިނިސްޓްރީ އިން ބުންޏެވެ.
Ministry of Health wishes to thank Universal Enterprises Pvt Ltd for the timely contribution of 2 PCR machines to strengthen COVID19 testing capacity in the country.@ameenex pic.twitter.com/yVU0GDTx8M
— Ministry of Health (@MoHmv) July 28, 2020
ޕީސީއާރު މެޝިންތައް ރަސްމީކޮށް ހެލްތް މިނިސްޓްރީއާ ހަދިޔާ ކުރުމަށް ރޭ ހެލްތު އިމަޖެންސީ އޮޕަރެޝަން ސެންޓަރުގައި ބޭއްވި ރަސްމިޔާތުގައި ހެލްތު މިނިސްޓަރު އަބްދުﷲ އަމީން ވަނީ ޔުނިވާސަލް އެންޓަޕްރައިސަސްގެ ފަރާތުން ލިބުނު އެހީތެރިކަމާއި އެއްބާރުލުން ފާހަގަކުރައްވާ ޔުނިވާސަލްގެ އިސްވެރިންނަށާއި މިކަމުގައި ހަރަކާތްތެރިވެ ވަޑައިގެންނެވި އެންމެހައި ބޭފުޅުންނަށް ޝުކުރު އަދާކުރައްވާފަ އެވެ.
ޔުނިވާސަލް އިން މީގެ ކުރިން ވެސް ކޮވިޑް-19 އަށް ޓެސްޓުކުރާ 20،000 ކިޓް ހަދިޔާކޮށްފައިވެ އެވެ.
ބަލި ފެތުރުން ކޮންޓްރޯލްކުރުމަށް ޓަކައި ބަލި ފެތުރޭ މިންވަރު ދެނެގަތުމަށް ޓެސްޓް ހަދާ މިންވަރު އަދިވެސް އިތުރު ކުރުމަށް ހެލްތު މިނިސްޓްރީން އަންނަނީ މަސައްކަތް ކުރަމުންނެވެ.
