ކޮވިޑަށް ޕޮޒިޓިވްވި އެއްމަހުގެ ކުއްޖަކު އެޑްމިޓްކޮށްފި

ކޮވިޑް-19 އަށް ޕޮޒިޓިވްވި އެއް މަހުގެ ތުއްތު ކުއްޖެއްގެ ހާލު ދެރަވެ، އައިޖީއެމްއެޗުގައި އެޑްމިޓުކޮށް ފަރުވާދޭން ފަށައިފި އެވެ.

ރާއްޖޭގައި ކޮވިޑަށް ޕޮޒިޓިވްވި ކުޑަކުދިންގެ ތެރޭގައި ތުއްތު ކުދިންވެސް ހިމެނެ އެވެ. ދިހަ އަހަރާ ހަމައަށް 210 ކުއްޖަކު ޕޮޒިޓިވްވެފައިވާ ކަމަށް އެޗްޕީއޭގެ ޗާޓުތަކުން ދައްކަ އެވެ.

އެއް މަހުގެ ކުއްޖާ އައިޖީއެމްއެޗުގައި އެޑްމިޓްކޮށްފައި ވަނީ މިއަދު އެވެ. އެ ހޮސްޕިޓަލުގެ ކުޑަކުދިންގެ ޑޮކްޓަރު ޑރ. އަހްމަދު ފައިސަލް ވިދާޅުވީ އެކުއްޖާ އެޑްމިޓްކޮށްފައި ވަނީ ވަރަށް ބޮޑަށް ހުން ގަދަވެގެން ކަމަށެވެ. އަދި ޑީހައިޑްރޭޓް ވެފައިވާ ކަމަށާއި، ގާތުން ދިނުމުގައި ވެސް ދަތިތަކެއް ހުރިކަން ފާހަގަވެފައިވާ ކަމަށެވެ.

މިއީ ކޮވިޑް ޖެހުނު ކުޑަކުއްޖެއްގެ ހާލު ދެރަވެގެން ފަރުވާދޭ ފުރަތަމަ ފަހަރެވެ.

ކޮވިޑް-19 އިގެ ކޭސްތައް ރާއްޖޭގައި 4،000 އަށް ވުރެ މަތި ވެފައިވާއިރު އެކްޓިވް ކޭސްތަކުގެ ގޮތުގައި 1،589 މީހަކު އެބަތިއްބެވެ.