ކޮވިޑްގެ ހާލަތު ގޯސްވާތީ އިތުރު ފިޔަވަޅު އަޅަނީ

ރާއްޖޭގައި ކޮވިޑް-19ގެ ހާލަތު އިތުރަށް ގޯސްވަމުން އަންނާތީ، އެކަމާ ގުޅިގެން އަޅާނެ އާ ފިޔަވަޅުތަކެއް މިއަދު އިއުލާން ކުރަން ސަރުކާރުން ނިންމައިފި އެވެ.

މައުލޫމާތު ލިބިފައިވާ ގޮތުގައި އަޅާނެ ފިޔަވަޅުތައް މިއަދު ހަވީރު 4:00 ގައި ބާއްވާ ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ނޫސްވެރިންގެ ބައްދަލުވުމުގައި އިއުލާން ކުރާނެއެވެ.

ރާއްޖޭގައި ކޮވިޑް19 ފެތުރޭ މިންވަރު އިތުރުވެ، ކޮވިޑް ކޭސްތައް 4،000 އިން މައްޗަށް ވަނީ އަރައިފަ އެވެ. ފާއިތުވި 24 ގަޑިއިރު ތެރޭ 129 މީހުން ވަނީ ކޮވިޑަށް ޕޮޒިޓިވް ވެފަ އެވެ. މިހާރު 1،490 މީހުންނަށް ބައްޔަށް ފަރުވާ ދެމުންދާއިރު 93 މީހުންނަށް ދަނީ ހޮސްޕިޓަލުގައި އެޑްމިޓްކޮށް ފަރުވާ ދެމުންނެވެ.

ކޮވިޑް ޖެހިގެން މިއަދުވެސް މީހާކު މަރުވެފައިވާއިރު މިހާތަނަށް މި ބަލީގައި 19 މީހަކު ވަނީ ރާއްޖެއިން މަރުވެފަ އެވެ.