ރަށްރަށުގައި ވެސް މާސްކު އެޅުމަށް އެދިއްޖެ

ރަށްތަކުގައި ދިރިއުޅޭ މީހުން ވެސް ބޭރަށް ނިކުންނައިރު މާސްކު އެޅުމަށް އެޗްޕީއޭ އިން އިލްތިމާސްކޮށްފި އެވެ.

ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން މިއަދު ހަވީރު ބޭއްވި ނޫސްވެރިންގެ ބައްދަލުވުމުގައި ހެލްތް މިނިސްޓްރީގެ ޕޮލިސީ ޕްލޭނިން އެންޑް އިންޓަނޭޝަނަލް ހެލްތް އައިޝަތު ސާމިޔާ ވިދާޅުވީ، މިއަދުން ފެށިގެން ކޮވިޑް ބަލި ފެނިފައިވާ ރަށްތަކުގައި މާސްކު އެޅުމަށް މަޖުބޫރުކޮށްފައިވާ ކަމަށެވެ.

އަދި މާލެ ސަރަހައްދެކޭ އެއް ގޮތައް ރާއްޖޭގެ ހުރިހާ ރަށެއްގައި މީހުން ބޭރަށް ނުކުމެ އުޅޭ އިރު، މާސްކު އެޅުމަށް ސާމިޔާ އެދިވަޑައިގެންނެވިއެވެ.

މީގެ އިތުރުން އެއް ރަށުން އަނެއް ރަށަށް ވައިގެން މަގުން އަދި ކަނޑުމަގުން ދިގު ދަތުރު ކުރާއިރުވެސް މާސްކު އެޅުމަށް މަޖުބޫރުކުރަން ނިންމާފައިވާކަމަށްވެސް ސާމިޔާ ވިދާޅުވިއެވެ.

މީގެ ކުރިން މާސްކު އެޅުން މަޖުބޫރުކޮށްފައިވަނީ ހަމައެކަނި މާލެ ސަރަހައްދުގައި އެކަންޏެވެ.

ބަލި އޮތް ރަށްތަކުގައި މާސްކު އެޅުން މަޖުބޫރު ކުރި އިރު މާލެއިން ބޭރު 10 ރަށަކުންގައި މިހާރުވެސް ބަލި ބަލިފެނިފައެވެ. އޭގެ އިތުރުން ހަތް ރަށަކަށް އަރާ ފޭބުންވެސް ވަނީ މަނާކޮށްފައެވެ.