ކޮވިޑް ޖެހިގެން 100 ވުރެ ގިނަ މީހުން އެޑްމިޓްކޮށްގެން ފަރުވާ ދޭން ފަށައިފި

ކޮވިޑް-19 ޖެހިގެން މިހާރު 1859 މީހަކު ފަރުވާ ހޯދަމުންދާ އިރު އޭގެ ތެރެއިން 110 މީހުންނަށް ފަރުވާ ދެނީ ހޮސްޕިޓަލުގައި އެޑްމިޓް ކޮށްގެނެވެ. ހޮސްޕިޓަލުގައި އެޑްމިޑް ކޮށްފައިވާ މީހުންގެ ތެރެއިން ހާލު ބޮޑުވެގެން 8 މީހަކަށް ފަރުވާދެނީ އައިސީޔޫގަ އެވެ. އައިސީޔޫގައި ފަރުވާދޭތަނުން އެކަކު އޮތީ ވެންޓިލޭޓަރުގަ އެވެ.

އިއްޔެ އަލަށް މި ބައްޔަށް 148 މީހަކު ޕޮޒިޓިވްވެފައިވާއިރު އޭގެ ތެރެއިން 117 މީހުންނަކީ ދިވެހިންނެވެ. އަދި ރާއްޖެ އައި އިތުރު ފަތުރުވެރި އެއްވެސް ވަނީ ޕޮޒިޓިވްވެފަ އެވެ.

ރާއްޖެއިން މިހާތަނަށް 4،594 މީހަކަށް ކޮވިޑް ޖެހިފައިވާއިރު، އޭގެ ތެރެއިން 2،706 މީހަކު ވަނީ ރަނގަޅުވެފަ އެވެ. މިހާރު ފަރުވާދެމުން އަންނަނީ 1،869 މީހަކަށެވެ. އަދި 19 މީހުން ވަނީ މި ބަލީގައި މިހާތަނަށް ރާއްޖެއިން މަރުވެފަ އެވެ.

ރާއްޖެއިން ފުރަތަމަ މި ބަލި ފެތުރެން ފެށިއިރު ގިނައިން މި ބައްޔަށް ޕޮޒިޓިވެފައިވަނީ ބިދޭސީންނެވެ. ނަމަވެސް ލޮކްޑައުންގެ ލުއިތަކަށްފަހު މިހާރު މި ބައްޔަށް ގިނައިން ޕޮޒިޓިވްވަމުންދަނީ ދިވެހިންނެވެ.

މާލެއާއި ބައެއް އަތޮޅު ތަކާއި ދެމެދު ދުއްވާ މުދާ އުފުލާ އުޅަނދުފަހަރުގެ ފަޅުވެރިން ޕޮޒިޓިވެ، ބައެއް ރަށްތަކުގައިވެސް ކޮވިޑް ފެތުރިދާނެ ކަމުގެ ބިރު މިހާރު ވަނީ ބޮޑުވެފަ އެވެ.