ކޮވިޑް-19 އަށް ހޭލުންތެރިކަން އިތުރު ކުުރުމަށް ކެމްޕެއިނެއް ފަށައިފި

"ކޮވިޑް ހުއްޓުވާނީ އަހަރެން" ގެ ނަމުގައި ރާއްޖޭގެ އޮންލައިން ނޫސްތަކާއި ޓީވީ އާއި ރޭޑިއޯ އާއި ނިއު މީޑިއާ ބައިވެރިވެގެން ހާއްސަ ކެމްޕެއިނެއް ރޭ ފަށައިފި އެވެ.

މިއީ ކޮވިޑްގެ ހާލަތު ރާއްޖޭގައި އިތުރަށް ގޯސްވަމުން ދާތީ، މީޑިއާތަކުން އިސްނަގައިގެން ހިންގާ ހަރަކާތެކެވެ.

މި ކެމްޕޭނު ފައްޓަވައިދެއްވީ ރައީސް އިބްރާހިމް މުހައްމަދު ސޯލިހެވެ. ކެމްޕޭން އިފްތިތާހު ކޮށްދެއްވުމަށް ފަހު އެ މަނިކުފާނު ވަނީ ހާއްސަ މެސެޖެއް ވެސް ދެއްވައިފަ އެވެ.

ކެމްޕޭނާ ގުޅޭގޮތުން މަޝްވަރާކުރުމަށް، ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ އިސް ވެރިންނާ އެކު މީޑިއާތަކުން މިދިޔަ ބުރާސްފަތި ދުވަހު ބޭއްވި ބައްދަލުވުމުގައި އެޗްއީއޯސީއާ ގުޅިގެން މީޑިއާގެ ކޮންޓެންޓްސް ވަރުގަދަކުރެވިދާނެ ކަމަށް މީޑިއާތަކުގެ އިސް ވެރިން ފާހަގަކުރެއްވި އެވެ.

އެޗްއީއޯސީން ވަނީ އާންމުންގެ ހޭލުންތެރިކަމަށް ބޭނުންވާ މައުލޫމާތު މީޑިއާއަށް ފޯރުކޮށްދިނުމަށް ތައްޔާރަށް ތިބިކަމަށް ވިދާޅުވެފައެވެ.