އެމްބީއޭއިން ކުޅުދުއްފުށީ ހިމެނޭހެން 4 ރަށަކަށް ވައިޑީޕީ ހިންގައިދޭނެ ކޯޗުން ހޯދަނީ

މޯލްޑިވްސް ބާސްކެޓްބޯލް އެސޯސިއޭޝަނު (އެމް.ބީ.އޭ)ގެ ފަރާތުން ކުޅުދުއްފުށީ ހިމެނޭހެން 4 ރަށަކަށް ވައި.ޑީ.ޕީ ހިންގައިދޭނެ ކޯޗުން ހޯދުމަށް އިއުލާނުކޮށްފި އެވެ.

އެމްބީއޭ އިން ކުރި އިއުލާނުގައި ބުނެފައިވަނީ އެ އެސޯސިއޭޝަނުގެ ފަރާތުން ރާއްޖޭގެ އަތޮޅުތަކުގައި ޔޫތް ޑިވެލޮޕްމަންޓް ޕްރޮގްރާމް (ވައި.ޑީ.ޕީ) ހިންގުމަށްޓަކައި 3 މަސްދުވަހުގެ މުއްދަތަށް ކޮންޓްރެކްޓް އުސޫލުން ބާސްކެޓްބޯޅަ ކޯޗުން ހޯދުމަށް ބޭނުންވާ ކަމަށެވެ.

އެ އެސޯސިއޭޝަނުގެ ފަރާތުން ވައިޑީޕީ ޕްރޮގުރާމް ހިންގުމަށް ހަމަޖެހިފައިވާ ރަށްތަކަކީ ކުޅުދުއްފުށީ، ހއ. ދިއްދޫގެ އިތުރުން ޏ.ފުވައްމުލައް އަދި ސ. ހިތަދޫ އެވެ.

އެމް.ބީ.އޭގެ މި ޕްރޮގުރާމަށް ކުރިމަތިލުމުގެ ޝަރުތަކީ އެމް.ބީ.އޭ ލައިސަންސް ކޯޗަކަށްވުމެވެ. އަދި ކޮންމެ ރަށަކަށްވެސް ހޯދަނީ އެންމެ ކޯޗެކެވެ. މުސާރަ އަކީ 5500 ރުފިޔާ އެވެ.

ޝައުގުވެރިވާ ފަރާތްތަކުން ކޯޗިންގ ދާއިރާގެ ވަނަވަރު އެނގޭނެ ލިޔުންތަކާއި ސީވީ މި މަހު 11 ވަނަ ދުވަހުގެ 13:00ގެ ކުރިން އެ އެސޯސިއޭޝަނުގެ މެއިލަށް ފޮނުވުމަށް ވަނީ އެދިފަ އެވެ. އަދި އިތުރު މައުލޫމާތު ހޯދުމަށް 3314024 ނަންބަރާ ގުޅުމަށް އެދޭކަމަށެވެ.