ހޯމް ކަރަންޓީނަށް ކުޅުދުއްފުއްޓަށް އަންނަ ފަރާތްތަކުގެ ހުއްދައަށް އެދުމުގެ އުސޫލަށް ބަދަލު ގެނެސްފި

ކޮވިޑް-19އާ ގުޅިގެން ހޯމް ކަރަންޓީނަށް ކުޅުދުއްފުއްޓަށް ދަތުރު ކުރާ ފަރާތްތަކުން ހޯމް ކަރަންޓީން ހުއްދަ ހޯދުމަށް ކުޅުދުއްފުށީ ކައުންސިލަށް އެދުމުގެ އުސޫލަށް ބަދަލު ގެނެސްފި އެވެ.

ކުޅުދުއްފުށި ކައުންސިލުން އިދާރާއިން އިއްޔެ ނެރުނު އިއުލާނެއްގައި ބުނީ ކޮވިޑް19އާ ގުޅިގެން ކުޅުދުއްފުއްޓަށް ދަތުރު ކުރާނަމަ ހޯމް ކަރަންޓީންވުމަށް ހުއްދަ ހޯދަން އެ ކައުންސިލަށް އެދުމުގެ އުސޫލަށް ވަނީ ބަދަލު ގެނެވިފައިކަމަށެވެ. އެގޮތުން މި މަހުގެ 2 ވަނަ ދުވަހުން ފެށިގެން ދަތުރުކުރުމުގެ ހުއްދައަށް އެދޭއިރު ދަތުރުކުރަން ބޭނުންވާ ތާރީހްގެ ރަސްމީ 03 ދުވަސް ކުރިން ހާލުބެލުން ޕޯޓަލް މެދުވެރިކޮށް ހުއްދައަށް އެދި ރަޖިސްޓަރ ވުމަށް ކައުންސިލުން ވަނީ އެދިފައެވެ.

ކައުންސިލުން ބުނީ ކަރަންޓީން ވުމަށް އެދޭ ގެ ޗެކް ކުރުމާއި ގުޅުންހުރި ލިޔެކިޔުން ތައްޔާރު ކުރުމަށް އެކަށީގެންވާ ވަގުތު އެ ކައުންސިލަށް ދިނުމަށް އިލްތިމާސް ކުރާކަމަށެވެ. އެގޮތުން އުސޫލު ބަދަލުކުރެވިފައި ވަނީ ހުއްދަ ދޫކުރުމުގައި ހުރިހާ ރައްޔިތުންނަށްވެސް އެއް ދުވެއްޔެއްގައި ހިދުމަތް ފޯރުކޮށްދެވޭކަން ކަށަވަރުކުރުމުގެ އިތުރުން ދުވަހުން ދުވަހަށް ހުއްދަތައް ދޫކުރުމުގައި އެކަށީގެންވާ ވަގުތު ނުލިބުމުގެ ސަބަބުން ދަތިތަކެއް ކުރިމަތިވަމުން ދާތީ ކަމަށެވެ.

ހުއްދަ ހޯދުމުގެ މަރުހަލާ އަވަސްކުރުމަށް، ހުރިހާ ގުޅުން ހުރި ލިޔުންތައް ހަމަކުރުމަށްފަހު 9531312 އަށް ވައިބަރ ކުރުމަށް ނުވަތަ އެ އިދާރާގެ ރަސްމީ އީމެއިލް އެޑްރެހަށް ދުރާލާ މެއިލް ކުރުމަށް ވަނީ އެދެފަ އެވެ.