ވީރާނާވާން ދޫކޮށްލި ރޯހައުސްތައް މަރާމާތުކޮށް ނިންމާލައިފި، ޖެނުއަރީގައި ހަވާލުކުރަނީ

ކުރީގެ ސަރުކާރުތަކުން ވީރާނާވާން ދޫކޮށް، މާފަލު ހިޔާގެ ރޯހައުސްތައް މަރާމާތުކޮށް ނިންމާ އަންނަ ޖެނުއަރީމަހު ހަވާލުކުރުމުގެ މަސައްކަތް ކުރަމުންދާކަމަށް މިނިސްޓްރީ އޮފް ނޭޝަނަލް ޕްލޭނިންގ އެންޑް ހައުންސިންގ އިންފުރާސްޓްރަކްޗަރ އިން ހާމަކޮށްފި އެވެ.

ކުޅުދުއްފުށީ، މާފަލު ހިޔާގައި މި ރޯހައުސްތައް ހަދަން ފެށީ ރައީސް މުހައްމަދު ނަޝީދުގެ ވެރިކަމުގަ އެވެ. އެހެންނަމަވެސް އެ މަސައްކަތްތައް އެ ވެރިކަމުގެ ނިންމާލެވިފައެއް ނުވެ އެވެ. ފަހުން އައި ދެ ވެރިކަމުގައި އެ ތަން ނިމުނުނަމަވެސް އެ ރޯހައުސްތައް އޭގެ ހައްގުވެރިންނަށް ހަވާލުކުރުމަށް މަސައްކަތް ކޮށްފައިނުވުމުގެ ސަބަބުން އެތަންތަން ވީރާނާވެ، ތަނުގެ ހުރި ތަކެތި ވަގަށް ނަގައި މުޅި ތަން ވަނީ ވަރަށް ބޮޑަށް ހަލާކުވެ ވިރާނާވެފަ އެވެ.

ރައީސް އިބުރާހިމް މުހައްމަދު ސޯލިހްގެ ސަރުކާރުން މި 40 ރޯހައުސް މަރާމާތުކުރުމަށް ފެނަކަ ކޯޕަރޭޝަންއާ ހަވާލުކުރީ މިއަހަރުގެ މާރޗުމަހުގެ ތެރޭގައި އެވެ. އެ ކޯޕަރޭޝަނާ ހަވާލުކުރީ 23 މިލިއަން ރުފިޔާއަށެވެ. ފެނަކައިން ޓިކްޓެކް ނަމަކަށް ކިޔާ ކުންފުންޏަކާ ހަވާލުކޮށްގެން ކުރިއަށްގެންދިޔަ މި މަޝްރޫއު މިހާރު ނިންމާލެވިފައިވާކަމަށް ޕްލޭނިންގ މިނިސްޓްރީން ވަނީ ހާމަކޮށްފަ އެވެ.

ޓިކްޓެކް ކުންފުންޏާ ފެނަކައިން ހަވާލުކޮށްފައިވަނީ 11 މިލިއަން ރުފިޔާއަށް 90 ދުވަސްތެރޭގައި ނިންމުމަށެވެ. އެހެންނަމަވެސް ކޮވިޑާ ހެދި މަސައްކަތަށް ކޮންމެވެސް ވަރެއްގެ ލަސްކަމެއް އައި އެވެ.

ކޭއޯއިން ސުވާލުކުރުމުން ޕްލޭނިންގ މިނިސްޓްރީން ބުނީ، ރޯހައުސްތަކުގެ މަސައްކަތް ނިންމާލެވިފައިވާ ކަމަށާ އެ ރޯހައުސްތައް ހަވާލުކުރުމަށްޓަކާ ވާން ޖެހޭ ތައްޔާރީތައް ވަމުންދާ ކަމަށެވެ. އަދި އަންނަ ޖެނުއަރީމަހު ހަވާލުކުރެވޭތޯ ދަނީ މަސައްކަތްކުރަމުން ކަމަށްވެސް ޕްލޭނިންގ މިނިސްޓްރީން ބުންޏެވެ.

ބޯހިޔާވަހިކަމުގެ މައްސަލައަކީ ކުޅުދުއްފުއްޓަށް ދިމާވެފައިވާ އެންމެ ބޮޑު އެއް މައްސަލައެކެވެ. ވެލިގަނޑުގައި ހުރި އިމާރާތްކުރަން ފަށާފައިހުރި ރޯހައުސްތައްވެސް މަރާމާތުކުރުމަށް ވަނީ ބަޖެޓްކުރެވިފަ އެވެ.