އިންޑިޔާ ބޯޑަރު ރަސްމީކޮށް ހުޅުވުން ޖެނުއަރީގެ ނިޔަލަށް ފަސްކޮށްފި

ކޮވިޑް-19 އާއި ގުޅިގެން ބަންދު ކުރި އިންޑިޔާގެ ބޯޑަރުތައް ހުޅުވައި އިންޓަނޭޝަނަލް ޝެޑިއުލްޑް ދަތުރުތަކަށް ބޯޑަރުތައް ހުޅުވާލުން އަނެއްކާ ވެސް ފަސްކޮށްފި އެވެ.

އެގައުމުގެ ޑިރެކްޓާ ޖެނެރަލް އޮފް ސިވިލް އޭވިއޭޝަން ސޮއިކުރައްވައި ނެރުއްވި ސާކިޔުލާއެއްގައި ބުނެފައި ވަނީ މިދިޔަ އަހަރުގެެ ޖޫން 26ގައި ނެރެފައިވާ ސާކިޔުލާގެ މުއްދަތު އިތުރުކޮށް 2021 ވަނަ އަހަރުގެ ޖެނުއަރީ 31ގެ ނިޔަލަށް އެ ސާކިޔުލާ އަށް އަމަލު ކުރަން ނިންމާފައިވާ ކަމަށެވ.

އިންޑިއާ އާއެކު އެއާ ބަބުލް އެގްރިމެންޓު ހަދާފައިވާ ގައުމުތަކަށް، އިންޑިއާ އަށް ފަސިންޖާ ފްލައިޓުތައް އޮޕަރޭޓު ކުރުމުގެ ހުއްދަ އޮންނާނެ އެވެ.

އިންޓަނޭޝަނަލް ޝެޑިއުލް ފަސިންޖާ ފްލައިޓުތަކަށް އިންޑިއާ އަށް ގޮސް އައިސްވުމުގެ ފުރުސަތު ލިބެނީ އެ ގައުމުން ދޭ ހާއްސަ ހުއްދައެއްގެ ދަށުންނެވެ.

އިންޑިއާ އާއެކު އެއާ ބަބުލް އެގްރިމެންޓު ހަދާފައިވާ ގައުމުތަކުގެ ތެރޭގައި ރާއްޖެ އާއި އަފްގާނިސްތާން، ބަހްރެއިން، ކެންޔާ، ކެނެޑާ، ފްރާންސް، ބޫޓާން، ޖަރުނަމު، އިރާގު، ޖަޕާން، އޮމާން، ނެދަލެންޑްސް، ގަތަރު، ޔޫކޭ އަދި އެމެރިކާ ހިމެނެއެވެ.

މި ގައުމުތަކާ އިންޑިއާ އާ ދެމެދު މިހާރު ވެސް ޝެޑިއުލް ދަތުރުތައް ބާއްވަ އެވެ.