ދަރުމަވެރިން އުފެއްދުމުގެ ގައުމީ ޕްރޮގްރާމެއް ފަށަނީ

ގައުމީ ފެންވަރުގައި ދަރުމަވެރިން އުފެއްދުމުގެ ޕްރޮގުރާމެއް ފެށުމަށް ޔޫތް މިނިސްޓްރީން ނިންމާ ބައިވެރިވުމުގެ ފުރުސަތު ހުޅުވާލައިފި އެވެ.

"ނެޝަނަލް ޔޫތް ވޮލަންޓިއަރ ޕްރޮގްރާމް"ގެ ނަމުގައި ކުރިއަށްގެންދިއުމަށް ނިންމާފައިވާ މި ޕްރޮގްރާމްގައި 16 އަހަރާއި 35 އަހަރުގެ އުމުރުފުރައިގެ މީހުންނަށް ބައިވެރިވެވޭނެ ކަމަށް ޔޫތް މިނިސްޓްރީން ބުނެ އެވެ.

ޔޫތް މިނިސްޓްރީން ފެށުމަށް ތައްޔާރުވަމުންދާ މި ޕްރިގްރާމަކީ، ސަރުކާރުގެ ސްޓްރެޓީޖިކް އެކްޝަން ޕްލޭންގައި ހިމެނޭ ޒުވާނުން ބާރުވެރިކުރުވައި އިސްނެގުމުގެ ރޫހު އާލާކުރުމަށް ކުރިއަށްގެންދިއުމަށް ނިންމާފައިވާ ޕްރޮގްރާމެކެވެ. މި ޕްރޮގްރާމްގެ މަގުސަދަކީ ގައުމީ ފެންވަރުގައި ޒުވާން ދަރުމަވެރިން އުފެއްދުންކަމަށް ޔޫތް މިނިސްޓްރީއިން ބުނެ އެވެ. އަދި ޒުވާނުންގެ މެދުގައި މުޖުތަމައުއަށް ހިދުމަތްކުރުމުގެ ރޫހު އާލާކޮށް ދަރުމަވެރިކަން ފުޅާކުރުންވެސް ޕްރޮގްރާމްގެ މަގުސަދުގެތެރޭގައި ހިމެނެއެވެ.

ޕްރޮގްރާމްގައި ވަކިވަކި ފަރުދުންނާއި، ޒުވާނުންގެ ތަރައްގީއަށް މަސައްކަތްކުރާ ކްލަބް ޖަމިއްޔާތަކަށް ބައިވެރިވެވޭނެއެވެ.

ދަރުމަވެރިންގެ މަސައްކަތް މުޖުތަމައުގެ ތެރެއަށް ބޮޑަށް ފެނިގެން ދަނީ ކާރިސާތަކުގައި ހިލޭ ސާބަހަށް މަސައްކަތް ކުރާ ހިތްވަރުގަދަ ބަޔެއްގެ ގޮތުގަ އެވެ.