ކޮވިޑް ކޭސްތައް ގިނަވަނީ، މިއީ ތިންވަނަ ރާޅެއްގެ ކޮޅުމަތި ބާ!

މިދިޔަ އަހަރުގެ މާޗުމަހުން ފެށިގެން މުޅި ދުނިޔޭގެ އިތުރުން ސިއްހީ ވަސީލަތްތައް މަދު މި ކުޑަކުޑަ ރާއްޖޭގައިވެސް އައީ ހަލުވިކަމާއި އެކު ކޮވިޑް-19 ގެ ބިރުވެރިކަން ފެތުރެމުންނެވެ.

ރާއްޖޭގައި ބަލި ފެތުރެންފެށުމާއިއެކު ސަރުކާރުން ދިޔައީ ރައްކާތެރިވުމުގެ ގޮތުން ގިނަ ފިޔަވަޅުތަކެއް އަޅަމުންނެވެ. އެގޮތުން ފުރަތަމަ ބަލި ފެތުރެން ފެށި މާލެ ސަރަައްދަށް ސިއްހީ ކުއްލި ނުރައްކަލުގެ ހާލަތު އިއުލާނުކޮށް މާލެ ސަރަހައްދަށް މީހުން އަރާ ފޭބުން މަނާ ކުރިއެވެ.

އެކި މަރުހަލާތަކަށް ބަހާލައިގެން ފިޔަވަޅުތައްވެސް ވަރުގަދަ ކުރަމުންގޮސް ރާއްޖޭގެ ބޯޑަރު ބަނދުކޮށް، ސްކޫލުތަކާއި ސަރުކާރުގެ އޮފީސްތަށްވެސް ބަނދުކުރި އެވެ.

ރާއްޖެއަށް ކޮވިޑް ފެތުރެން ފެށިއިރު ދުވާލަކު ޕޮޒިޓިވްވާ މީހުންގެ އަދަދު ދިޔައީ އިތުރުވަމުންނެވެ. އެ ދުވަސްވަރު ފުރަތަމަ މި ބަލި ބިދޭސީންގެ ތެރޭގައި ހަލުވިކަމާއިއެކު ފެތުރެން ފެށުމުން ބިދޭސީން ރައްކާތެރިކަމުގެ އެކި ތަންތަނަށް ބަދަލުކުރެވުނެވެ. އެހެން ކަމުން އެ މީހުންގެ ތެރެއިން ވަރަށް ބޮޑަށް ބަލި ކޮންޓްރޯލުވެސްވި އެވެ.

ދިވެހިންގެ ތެރޭގައިވެސް ބަލި ފުދޭވަރަކަށް ކޮންޓްރޯލުވެ ކޭސްތަށް މަދުވާން ފެށުމުން ރައްކާތެރިކަމުގެ ގޮތުން ސަރުކާރު އެޅި ފިޔަވަޅުތަކަށް އެކި މަރުހަލާތަކަށް ބަހާލައިގެން ލުއި ދެމުން ދިޔަ އެވެ. ފުރަތަމަ ލުއިދޭން ފެށިތަނުން ކޭސްތައް ގިނަވާން ފެށުމަށްފަހު އަނެއްކާވެސް ކޮންޓްރޯލްވެ ކޭސްތައް މަދުވި އެވެ.

ރާއްޖޭގެ ބޯޑަރުތަށް ހުޅުވާލައި ރިސޯޓްތަކާއި ގެސްޓް ހައުސްތައް އޮޕްރޭޓް ކުރަން ފަށައިފި އެވެ. އަދި ހަމަ އެއާއެކު ރާއްޖެއިން އަނެއްކާވެސް ކޮވިޑްގެ ކޭސްތައްވެސް ގިނަވާން ފަށައިފި އެވެ.

މިދިޔަ މަހު 24 ވަނަ ދުވަހުން ފެށިގެން އަނެއްކާވެސް އަތޮޅުތެރެއަށް މިވަނީ ކޮވިޑްގެ ބިރުވެރިކަން ފެތުރެން ފަށާފަ އެވެ. އެގޮތުން ގއ. ދެއްވަދޫއިން ހޯމް ކަރަންޓީނުގައި ހުރިމީހަކު ކަރަންޓީން މުއްދަތު ހަމަވުމަށްފަހު ދޫކޮއްލި އިރު ނުބައި ނަތީޖާއެއް ދެވުމުގެ ސަބަބުން އެ ރަށުގައި ކޮވިޑް ފެތުރި އެރަށަށް ދަތުރު ކުރި އެތައް ބަޔަކު ވަނީ ޕޮޒިޓްވެފަ އެވެ. އެހެން ކަމުން މިކްލަސްޓާއަކީ މިހާރު ފުދޭވަރަކަށް ބޮޑު ކުލަސްޓާއަކަށް މިވަނީ ވެފަ އެވެ.

އެގޮތުން މި ކްލަސްޓާގައި ގއ. ދެއްވަދޫގެ އިތުރުން އެ އަތޮޅު ވިލިނގިލި، ދާންދޫ، ލ. ފޮނަދޫ، ގަން އަދި ހުޅުމާލެއިން މީހުން ވަނީ ޕޮޒިޓިވްވެފަ އެވެ. މިކްލަސްޓާގައި ޕޮޒިޓިވްވި މީހުންގެ އަދަދުވަނީ 60 އިން މައްޗަށް އަރާފަ އެވެ.

ހަމަ އެއާއެކު އޮޕަރޭޓްކުރަމުން އަންނަ ރިސޯޓްތަކުގެ މުވައްޒަފުން ޕޮޒިޓިވްވާ އަދަދުވެސް މިއަންނަނީ ދުވަހެއް ދުވަހަކަށް އިތުރުވަމުންނެވެ.

މި މަހުގެ 10 ވަނަ ދުވަހު ސްކޫލުތައް ހުޅުވުމާއި ގުޅިގެން މާލެ ސަރަހައްދުގެ ސްކޫލުތަކުގެ ޓީޗަރުންނާއި ދަރިވަރުންވެސް އަންނަނީ ގިނައަދަދަކަށް ޕޮޒިޓިވްވަމުންނެވެ.

މިބަލީގައި ރާއްޖެއިން މިހާތަނަށް 49 މީހުން ވަނީ މަރުވެފައެވެ. މި ވަގުތު 901 މީހުން ބައްޔަށް ފަރުވާހޯދަމުންދާއިރު 68 މީހުންނަށް ފަރުވާދެނީ ހޮސްޕިޓަލުގައި އެޑްމިޓްކޮށްގެނެވެ.

މިހާތަނަށް މުޅި ދުނިޔެއިން މިބަލީގައި 2،022،059 މަރުވެފައިވާކަށް ތަފާސް ހިސާބުތަކުން ދައްކައެވެ. އަދި 94،490،863 މީހުންނަށް ވަނީ ބަލިޖެހިފަ އެވެ.