ހުރިހާ ހޮސްޕިޓަލްތަކެއްގައި މާދަމާ ވެކްސިން ދޭން ފަށަނީ

ރާއްޖޭގެ ހުރިހާ ހޮސްޕިޓަލްތަކެއްގައި މާދަމާ ވެކްސިން ދޭން ފަށާނެ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ހާމަކޮށްފި އެވެ.

އެޗްއީއޯސީގެ ތަރުޖަމާނު ޑރ. ނަޒްލާ ރަފީގް މިހާރު ނޫހަށް ދެއްވި އިންޓަވިއެއްގައި ވިދާޅުވީ އަމާޒަކީ ރާއްޖޭގައި ތިބި ހުރިހާ ހެލްތު އަދި އަދި ސޯޝަލް ވޯކަރުންނަށް 10 ދުވަސް ތެރޭގައި ވެކްސިން ޖެހުން ކަމަށެވެ.

މާދަމާ ހުރިހާ ހޮސްޕިޓަލްތަކަކުން ވެކްސިން ޖަހަން ފަށާއިރު 4 ފެބްރުއަރީ ގައި ހުރިހާ ހެލްތު ސެންޓަރުތަކުންވެސް ވެކްސިން ޖަހަން ފަށާނެ ކަމަށް ނަޒްލާ ވިދާޅުވި އެވެ. ސިއްހީ ހިދުމަތްތެރިން ނިމުމުން ދެން އެންމެ އިސްކަންދޭން ޖެހޭ ގްރޫޕްތަކަށް މިހާރު ހުރި ވެކްސިން ޖަހާނެ އެވެ. މުޅި ރާއްޖޭގައި ކޮވިޝީލްޑުގެ ފުރަތަމަ ޑޯޒް ދީ ނިމޭނެ ދުވަހެއް އަދި ނޭނގެ އެވެ.

ނަޒްލާ ވިދާޅުވީ އެންމެ ބޮޑު ކަންބޮޑުވުމަކީ ކޮވިޑް ކޭސްތައް އިތުރުވަމުންދާތީ އެކަމުން ވެކްސިން ޕްރޮގްރާމަށް ބުރޫއެރުމެވެ.

ރާއްޖެ އަށް ބޭނުންވާ ވެކްސިން ކުރިއަށް އޮތް ދެ މަހުގެ ތެރޭގައި ލިބޭނެ ކަމަށް ވަނީ ލަފާކޮށްފަ އެވެ. ޑަބްލިއުއެޗްއޯ އިން ރާއްޖެ އަށް ދޭ ވެކްސިން މި މަސްތެރޭގައި ލިބޭއިރު ރާއްޖެ އިން ގަންނަ 70،000 ޑޯޒު އެޕްރީލް މަހުގެ ތެރޭގައި ލިބޭނެ ކަމަށް ހެލްތު މިނިސްޓަރީން މައުލޫމާތު ދެއެވެ.

ސަރުކާރުގެ ވިސްނުމަކީ މި ގައުމުގައި ތިބި ބިދޭސީން ހިމެނޭ ގޮތުން އެންމެންނަށް ހިލޭ ވެކްސިން ދިނުމެވެ. މީގެތެރެއިން އަދި އިސްތިސްނާ ވަނީ މާބަނޑު މީހުންނާއި އުމުރުން 18 އަހަރު ނުފުރޭ ކުދިންނެވެ.