ވެކްސިނާ ގުޅޭ ދޮގު މައުލޫމާތު ނުފެތުރުމަށް މީޑިއާ ކައުންސިލުން އަންގައިފި

ކޮވިޑް-19 ވެކްސިންއާ ގުޅޭ ހަބަރާއި މައުލޫމާތު މީޑިއާތަކުން ގެނެސްދިނުމުގައި، ރާއްޖޭގައި ދިނުމަށް ކަމާބެހޭ ފަރާތްތަކުން މިވަގުތު ހުއްދަ ދީފައިވާ ވެކްސިންތަކުގެ ރައްކާތެރިކަމާއި މެދު ރައްޔިތުންގެ މެދުގައި ޝައްކާއި ވަހުމް އުފެދޭގޮތަށް ހަގީގަތާ ހިލާފު ދޮގު ހަބަރާއި މައުލޫމާތު ނުފެތުރުމަށް މޯލްޑިވްސް މީޑިއާ ކައުންސިލު (އެމްއެމްސީ) އިލްތިމާސް ކޮށްފިއެވެ.

އެމްއެމްސީ އިން މިއަދު ނެރުނު ނޫސްބަޔާނެއްގައި ބުނީ، ކޮވިޑް ވެކްސިނާ ގުޅޭ ހަބަރާ މައުލޫމާތު ފެތުރުމުގައި ބައެއް މީޑިއާތަކުން ވެކްސިނުގެ ރައްކާތެރިކަމާމެދު ރައްޔިތުންގެ މެދުގައި ޝައްކު އުފެދި އިތުބާރު ގެއްލޭފަދަ ގޮތްގޮތަށް ހަބަރާއި މައުލޫމާތު ފޯރުކޮށްދެމުން އަންނަ ކަމަށާއި އެކަން ކުށްވެރިކުރާ ކަމަށެވެ.

ދޮގުމައުލޫމާތުގެ ސަބަބުން އިޖުތިމާއީ އެތައް މައްސަލަތަކެއް އުފެދެމުންދާކަމުގެ ޝަކުވާ އާންމުންގެ ފަރާތުން ވެސް ލިބެމުންދާކަމަށް މީޑިއާ ކައުންސިލުން ބުނެއެވެ.

އަދި ކޮވިޑް-19 ވެކްސިންއާ ގުޅޭގޮތުން މަޢުލޫމާތު ފެތުރުމުގައި އޭގެ ޞައްޙަ މަޢުލޫމާތު ދައުލަތުގެ ކަމާބެހޭ އިދާރާތަކުން ކަށަވަރު ކުރުމަށާއި، ވެކްސިންއާ ގުޅޭ މަޢުލޫމާތު ޙަވާލާދޭ މަސްދަރުތަކަކީ ދުނިޔޭގެ ސިއްޙަތު ޖަމްއިއްޔާއާއި ބައިނަލްއަޤްވާމީ އިދާރާތަކުގެ މިންގަނޑުތަކާ އެއްގޮތަށް ޝާއިޢު ކޮށްފައިވާ މަޢުލޫމާތުކަން ކަށަވަރުކުރުމަކީ ނޫސްވެރިންގެ ފަރުދީ އަދި ޕްރޮފެޝަނަލް ޒިންމާއެއްކަމަށް އެ ބަޔާނުގައި ފާހަގަ ކޮށްފައިވެއެވެ.

މީގެއިތުރުން ކޮވިޑް ވެކްސިނާމެދު އާމުން ހޭލުންތެރިކުރުމާއި ސައްހަ މައުލޫމާތުތައް ބައެއް މީޑިއާތަކުން ގެނެސްދޭކަން ފާހަގަކޮށް، މިފަދަ ކޮންޓެންޓްތައް މިހާރަށްވުރެ ގިނައިން ގެނެސްދިނުމަކީ ކައުންސިލުން ބާރުއަޅާ ކަމެއް ކަމަށް ކައުންސިލުން ވަނީ ފާހަގަކޮށްފަ އެވެ.