ކުޅުދުއްފުށީގައި ދެ ސައިކަލް ޖެހި ހިނގި އެކްސިޑެންޓެއްގައި ތިން މީހަކަށް އަނިޔާވެއްޖެ

ކުޅުދުއްފުށި ސިޓީގައި މިއަދު ދެ ސައިކަލް އެކްސިޑެންޓްވެ ތިން މީހަކަށް އަނިޔާވެއްޖެ އެވެ. މި ތިން މީހުންނަށް މިހާރު ދަނީ ކުޅުދުއްފުށީ ރީޖަނަލް ހޮސްޕިޓަލުގައި ފަރުވާދެމުންނެވެ.

އަތޮޅު ކައުންސިލާ ދިމާ، އަމީނީމަގުގައި މިއަދު 11 ޖަހާއެހާއިރު ހިނގި މި އެކްސިޑެންޓް އެއް ސައިކަލްގައި އިނީ ދެ އަންހެނެކެވެ. އެއީ 19 އަހަރުގެ އަންހެނަކާއި 15 އަހަރުގެ ކުއްޖެކެވެ.

އެ ދެ މީހުންނަށްވެސް އެކި ވަރުގެ އަނިޔާ ލިބިފައިވާއިރު އެމީހުންނަށް ދަނީ ކޭއާރުއެޗުގައި އެމެޖެންސީ ރޫމްގައި ފަރުވާދެމުންނެވެ. އަނެއް ސައިކަލްގައި ދުއްވަން އިނީ 21 އަހަރުގެ ފިރިހެނެކެވެ. ސޯޝަލް މީޑިއާއިން ފެންނަ ފޮޓޯތަކުން އޭނާގެ މޫނުމަތިން އެކި ވަރުގެ ޒަހަމުތައް ފެނެ އެވެ.

ކޭއާރުއެޗުން ބުނީ އެކްސިޑެންޓްގައި އަނިޔާވި 21 އަހަރުގެ މީހާއަށް ބޭސް އަޅާ ކޮޓަރީގައި ފަރުވާދެމުންދާއިރު އޭނާއަށް ބޮލަށް އަނިޔާވެފައިވޭތޯ ބެލުމަށް ސީޓީ ސްކޭނެއް ހެދުމަށް ހަމަޖެހިފައިވާ ކަމަށެވެ. އަދި ފަރުވާދެމުންދާތީ އިތުރު ތަފްސީލް މިވަގުތު ދެވެން ނެތް ކަމަށް ހޮސްޕިޓަލުން ބުނެ އެވެ.

އިއްޔެވެސް ދެ ސައިކަލް ޖެހި ކުޅުދުއްފުށީގައި ވަނީ އެކްސިޑެންޓެއް ހިނގާފަ އެވެ.