ފެނަކަ ކޯޕަރޭޝަނުން ލ ގަމުގެ ފަސް މިސްކިތަކާއި އިޖުތިމާއީ މަރުކަޒުގައި ސޯލާ ފީވީ ނިޒާމު ގާއިމުކުރުމަށް އެއްބަސްވުމުގައި ސޮއިކޮށްފި އެވެ.
މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ފެނަކައިގެ ފަރާތުން ސޮއިކުރެއްވީ އެ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދެވެ. ގަމު ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް މުހައްމަދު ޝިޔާމެވެ.
މިރަސްމީޔާތުގައި ވާހަކަދައްކަވަމުން އެމްޑީ ސައީދު ވިދާޅުވީ މި އެއްބަސްވުމުގެ ސަބަބުން ފެނަކައަށް އިތުރު މަޝްރޫއު ތަކެއް ލިބުމަށް މަގުފަހި ވެގެން ދާނެ ކަމަށް ގަބޫލު ކުރެވޭ ކަމަށާއި މި ސޮއި ކުރެވުނު އެއްބަސް ވުނަތަކަކީ ތާރީހީ އެއްބަސް ވުންތަކެއް ކަމަށެވެ.
އޭނާ ވިދާޅުވީ ފެނަކައިގެ އަމާޒަކީ ހަކަތަ އުފައްދާއިރު ވީހާވެސް ބޮޑަށް، ތިމާވައްޓަށް ފައިދާވާނެ ގޮތަށް މަސައްކަތް ކުރުން ކަމަށާއި އެގޮތުން މިއަހަރުގެ ނިޔަލަށް، 12 މެގަވޯޓުގެ ކަރަންޓު އިއާދަކުރަނަވި ހަކަތައިން އުފެއްދުމަށް އަމާޒު ހިފާފައި ވާނެ ކަމަށެވެ. އަދި އެކަމަށްޓަކާ ޅ އޮޅުވެލިފުށީގައި 150 ކިލޯވޯޓްގެ ސޯލާ ޕެނަލް ހަރުކޮށް ކަމިޝަން ކުރުމުގެ މަސައްކަތް ކުރިއަށްދާކަމަށެވެ.
ނެޓްމީޓަރިންގ އުސޫލުން ލ.ގަމުގައި 5 މިސްކިތާއި އިޖްތިމާއީ މަރުކަޒުގައި ސޯލަރ ޕީވީ ނިޒާމު ގާއިމްކުރުމަށް ވެވޭ އެއްބަސްވުމުގައި އެމް.ޑީ އަޙްމަދު ސައީދް އާއި ގަމު ކައުންސިލްގެ ރައީސް މުޙައްމަދު ޝިޔާމް ސޮއިކުރައްވަިފި. #ޓީމްފެނަކަ pic.twitter.com/1yt8Yr0Jzq
— Fenaka Corporation Ltd (@TeamFenaka) March 23, 2021
ހަމައެއާއެކު 6 މެގަވޯޓްގެ ޕީވީ ރަށްރަށުގައި އިންސްޓޯލްކުރުމަށްޓަކާ ހޯދުމަށް ބީލަމަށް ހުޅުވާލެވިފައިވާ ކަމަށް ސައީދު ވިދާޅުވި އެވެ.
މިހާރުވެސް ފެނަކައިން ދަނީ އިއާދަކުރަނަވި ހަކަތައިން 8 މެގަވޯޓުގެ ކަރަންޓު އުފައްދާ އޭގެ ބޭނުން ކުރަމުންނެވެ. އަދި އެކަމުގެ ސަބަބުން ގިނަ އަދަދެއްގެ ފައިސާ ސަލާމަތް ކުރެވޭކަމަށް އެ ކުންފުނިން ވަނީ ބުނެފަ އެވެ.
