މާލެ ސަރަަހައްދުގައި ކޮވިޝީލްޑް ދެވަނަ ޑޯޒް ދޭން ފަށައިފި

ކޮވިޝީލްޑް ވެކްސިންގެ ދެވަނަ ޑޯޒު މާލެ ސަރަހައްދުގައި މިއަދު ދޭން ފަށައިފި އެވެ.

މިއަދު ހެނދުނުން ފަށައިގެން ކޮވިޝީލްޑްގެ ދެވަނަ ޑޯޒު މާލެ ސަރަހައްދުގައި ޖަހައިދޭން ފަށާފައިވާ ކަމަށާއި ދެވަނަ ޑޯޒު ޖަހަންދާއިރު، ވެކްސިން ކާޑާއެކު އައިޑީކާޑު، ޕާސްޕޯޓު ނުވަތަ ލައިސަންސް ކާޑު ގެންދިއުމަށް އެޗްޕީއޭއިން ވަނީ ބުނެފައެވެ.

ވެކްސިންގެ ދެވަނަ ޑޯޒު ދޭން ފަށާފައިވަނީ ފުރަތަމަ ޑޯޒު ދޭން ފެށިތާ ދެ މަސް ފަހުންނެވެ. އެޗްޕީއޭއިން ބުނީ ރަނގަޅަށް ކައިގެން ވެކްސިން ޖަހަން ދިއުމަށާއި ހުން އައުމާއި ބަލީގެ އެއްވެސް އަލާމާތެއް ހުރުން ނުވަތަ ކޮންޓެކްޓަކަށް ވާނަމަ ވެކްސިން ޖަހަން ނުދިއުމަށެވެ.

ރާއްޖޭގެ ހެލްތު މިނިސްޓްރީއާއި އިންޑިއާގެ ސިރަމް އިންސްޓިޓިއުޓާ ދެމެދު ހެދި އެއްބަސްވުމެއްގެ ދަށުން ރާއްޖެއިން ގަތް އެއްލައްކަ ޑޯޒް ކޮވިޝީލްޑް ވެކްސިން މިދިޔަ މަހު 29ވަނަ ދުވަހު ރާއްޖެއަށް ވަނީ ގެނެސްފަ އެވެ.

ކޮވިޝީލްޑްގެ ދެވަނަ ޑޯޒު ޖަހަން ފަށާފައިވާއިރު، މިވަގުތު ރާއްޖޭގައި ފުރަތަމަ ޑޯޒު ޖަހައިދެމުންދަނީ ސައިނޯފާމް ވެކްސިން އެވެ.

ރާއްޖެއިން މިހާތަަނަށް ޖުމުލަ 241،127 މީހުން ވަނީ ވެކްސިން ޖަހާފަ އެވެ.