ބޮޑު ދުވަސް، ކުޅުދުއްފުއްޓަށް އާ ތާރީހެއް

އާބާދީގައި ދިހަހާސް ހަމަވެ، ސިޓީއެއްގެ ދަރަޖަ ނުދީގެން ރައްޔިތުން ސޯޝަލް މީޑިއާގައި އަޑުއުފުލަމުންދަނިކޮށް، ރައީސުލް ޖުމްހޫރިއްޔާ އިބުރާހިމް މުހައްމަދު ސޯލިހް ކުޅުދުއްފުއްޓަށް ސިޓީއެއްގެ ދަރަޖަ ދޭން ނިންމިކަން އިއުލާނުކުރެއްވީ 2019 ވަނަ އަހަރުގެ ޑިސެމްބަރުގެ 31 ވަނަ ދުވަހުގެ މެންދުރު 1:26 ގައި އެވެ.

އެމަނިކުފާނުގެ ޓްވީޓްގައި ވިދާޅުވެފައިވަނީ" 1 ޖެނުއަރީން ފެށިގެން ހދ ކުޅުދުއްފުއްޓަކީ ލާމަރުކަޒީ ގާނޫނުގައި އޮންނަ އުސޫލުން ސިޓީއެއްގެ ދަރަޖަކަމުގައި ހަމަޖެއްސުމަށް މިއަދު އަޅުގަނޑު ނިންމައިފިން". އެވެ.

މި ނިންމުން ވެގެންދިޔައީ އެ ސިޓީގެ ރައްޔިތުންނަށް އިންތިހާއަށް އުފާވެރިކަން ގެނުވި ވަގުތަކަށެވެ. އެކަމަކު އެއަށްފަހު އަދިވެސް ރަސްމީ ސިފައެއްގައި ސިޓީއެއްގެ ދަރަޖަ ނުލިބި، ލަސްވެގެންދިޔައީ ކައުންސިލް އިންތިހާބު ފަސްވަމުންދިޔުމުގެ ސަބަބުންނެވެ.