ފޮރިން މިނިސްޓަރު ޝާހިދު ރަސްމީ ދަތުރުފުޅެއްގައި އިންޑިއާއަށް

ފޮރިން މިނިސްޓަރު އަބްދުﷲ ޝާހިދު ރަސްމީ ދަތުރުފުޅެއްގައި އިންޑިއާއަށް ވަޑައިގެންފި އެވެ. މިނިސްޓަރުގެ މި ދަތުރުފުޅަކީ އޭޕްރީލް 15 އިން 16 އަށް ކުރައްވާ ދަތުރުފުޅެކެވެ.

މި ދަތުރުފުޅުގައި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސް ޖައިޝަންކަރް އާއި ބައްދަލުކުރެއްވުމަށް ވަނީ ހަަމަޖެހިފައެވެ. މި ބައްދަލުކުރެއްވުމުގައި ބައިލޭޓަރަލް އަދި މަލްޓިލޭޓަރަލް ކަންކަމާ ބެހޭ ގޮތުން ދެ ބޭފުޅުން މަޝްވަރާކުރައްވާނެ ކަމަށް ފޮރިން މިނިސްޓްރީ އިން މައުލޫމާތު ދެއެވެ.

އިންޑިއާ އިން ވަނީ ކޮވިޑު 19ގެ ހާލަތުގައި ރާއްޖެއަށް އެހީތެރިކަން ދޯރުކޮށްދީ ދެ ލައްކަ ވެކްސިން ޑޯޒު ހަދިޔާކޮށްފަ އެވެ. އަދި އިންޑިއާ އިން ވެކްސިން އެކްސްޕޯޓު ކުރުން މަޑުޖައްސާލާފައި އޮތް ނަމަވެސް ރާއްޖެއަށް ބޭނުންވާ ވެކްސިން ގެނައުމުގެ އިންތިޒާމު ހަމަޖައްސާދީފައި ވެއެވެ.

މީގެ އިތުރުންވެސް މާލެ-ތިލަފުށި ބްރިޖު މަޝްރޫއާއި މާލެ ސަރަހައްދުގައި ހައުސިން ޔުނިޓު އެޅުން، އައްޑޫ އެއާޕޯޓާއި ހަނިމާދޫ އެއާޕޯޓު ތަރައްގީ ކުރުުމުގެ މަޝްރޫއަކީ އިންޑިއާގެ އެހީގެ ދަށުން ކުރިއަށް ގެންދާ މަޝްރޫއުތަކެކެވެ.