ޕޮޒިޓިވް ކޭސްތަކާ ގުޅިގެން ނެގި ސާމްޕަލްތައް ނެގެޓިވް

ބަލީގެ އަލާމަތް ހުރެގެން ކުޅުދުއްފުށީ ފުލޫ ކްލިނިކަށް ދެއްކި 3 މީހަކު ކޮވިޑަށް ޕޮޒިޓިވްވުމާ ގުޅިގެން އެމީހުންގެ ކޮންޓެކްޓް ޓްރޭސިންގެ ތެރެއިން މިހާތަނަށް 44 މީހެއްގެ ސާމްޕަލް ނަގާފައިވާ ކަމަށާއި އެ ހުރިހާ ސާމްޕަލެއްވެސް ނެގެޓިވްކަމަށް ކުޅުދުއްފުށީ ރީޖަނަލް ހޮސްޕިޓަލުން ބުނެފިއެވެ.

އެ ހޮސްޕިޓަލުން ބުނީ މިވަގުތު 12 ގެއެއް މޮނީޓަރިންނަށް ލާފައިވާކަމަށާއި ޕޮޒިޓިވްވި 3 މީހުންގެ ކްލޯޒް ކޮންޓެކްޓުގެ ގޮތުގައި 25 މީހަކު އެބަތިބި ކަމަށެވެ. މިއަދުވެސް 50 ރޭންޑަމް ސާމްޕަލް ނަގަން ހަމަޖެހިފައިވާކަމަށެވެ.

ކުޅުދުއްފުށިން ޕޮޒިޓިވްވި މީހުންނަކީ އެއްއާއިލާއަކަށް ނިސްބަތްވާ 3 މީހުންނެވެ. ޕޮޒިޓިވްވެފައިވަނީ ދެމަފިރިއަކާއި އާއިލާގެ އިތުރުން މެމްބަރެކެވެ. އެއީ 24 އަހަރާއި 35 އަދި 52 އަހަރުގެ މީހުންނެވެ.

އަތޮޅު ތެރޭގައިވެސް ކޮވިޑް ވަރަށް ބޮޑަށް ފެތުރިފައިވާއިރު މިހާރު ރާއްޖޭގައި އެކްޓިވް ކޭސްތަކުގެ އަދަދުވަނީ 5000 އަށްވުރެ މައްޗަށް އަރާފައެވެ. މި ބަލީގައި ރާއްޖޭން މިހާތަނަށް 74 މީހަކު ވަނީ މަރުވެފައެވެ.

ރާއްޖޭގައި އެއް ރަށުން އަނެއް ރަށަށް ޒަރޫރީ ބޭނުމެއްގައި މެނުވީ ދަތުރު ނުކުރުމަށް އެޗްޕީއޭއިން ވަނީ އިލްތިމާސްކޮށްފައެވެ.