ކޮވިޝީލްޑް ސްޓޮކް ލިބޭނީ ދެ ހަފްތާ ފަހުން: އެޗްޕީއޭ

ކޮވިޝީލްޑް ވެކްސިންގެ ސްޓޮކް ދެން ލިބޭނީ ދެ ހަފްތާއެއްހާ ފަހުންކަަމަށް އެޗްޕީއޭއިން ބުނެފި އެވެ. އެޗްޕީއޭއިން ނެރުނު ނޫސް ބަޔާނެއްގައި ބުނީ ކޮވިޝީލްޑު ބްރޭންޑުގެ ވެކްސިންގެ އާ ޝިޕްމަންޓެއް ރާއްޖެ ގެނައުމުގެ އިންތިޒާމުތައް މިހާރު ހަމަޖައްސަމުން ދާ ކަމަށެވެ.

ކޮވިޝީލްޑް ވެކްސިން ޖެހުން މާލެ ސަރަހައްދުގައި ހުއްޓާލާފައިވާއިރު އާންމުކޮށް ހުޅުވާލައިގެން ކޮވިޝީލްޑް ވެކްސިން އަލުން ޖަހައިދޭން ފަށާނެ ތާރީހެއް ފަހުން އިއުލާން ކުރާނެ ކަމަށް އެ ބަޔާނުގައި ބުންޏެވެ. ނަމަވެސް ހާއްސަ ހާލަތްތައް މެދުވެރިވެފައިވާ ފަރާތްތަކަށް އެމަޖެންސީ ހާލަތުގައި އެ ވެކްސިން ޖަހައިދޭނެ ކަމަށް އެޗްޕީއޭއިން މައުލޫމާތު ދެއެވެ.

ކޮވިޑްގެ ބަލިމަޑުކަމުގައި މުޅި ދުނިޔެއަށްވެސް ހާލަތު ގޯސްވެފައިވާ މި ދަނޑިވަޅުގައި ވެކްސިން އުފެއްދުމާއި ވެކްްސިން ފޯރުކޮށްދިނުމަށް ހުރިހާ ގައުމަކަށްވެސް ދަތިތަކެއް ކުރިމަތިވެފައިވާ ކަމަށް ބަޔާނުގައި ފާހަގަކޮށްފައި ވެއެވެ.

މިހާތަނަށް ވެކްސިންގެ ދެވަނަ ޑޯޒް 108،494 މީހުން ޖަހާފައިވާއިރު ރާއްޖޭގައި ވެކްސިން ޖެހޭ އާބާދީގެ 67.69 ޕަސަންޓު މީހުން ވެކްސިން ޖަހާފައިވާކަމަށް އެ ބަޔާނުގައި ބުންޏެވެ.