ޔޫކޭ ރެޑްލިސްޓްގައި ރާއްޖެ ހިމަނައިފި

އިނގިރޭސިވިލާތާ ދެމެދު ދަތުފަތުރުކުރުން ހުއްޓައިލުމަށް އެކުަލަވާލާފައިވާ ރެޑް ލިސްޓުގައި ރާއްޖެ ހިމަނައިފި އެވެ.

ކޮވިޑް-19 ގެ ބަލިމަޑުކަމުގެ ހާލަތު އެންމެ ގޯސްވެފައިވާ ގައުމުތަކާއި ޔޫކޭ ދެމެދު އެކުލަވާލައިފައިވާ ރެޑް ލިސްޓުގައި އެންމެފަހުން ހިމަނާފައިވަނީ ރާއްޖެއާއި ތުރުކީ އަދި ނޭޕާލެވެ. އިނގިރޭސި ބޮޑުވަޒީރު ބޮރިސް ޖޯންސަން އެ ގައުމުގެ ޕާލަމެންޓުގައި ވިދާޅުވީ އެ ލިސްޓުގައިވާ 22 ގައުމުން އިނގިރޭސިވިލާތަށް ދަތުރުކުރުން މަނާކުރުމުގެ އިތުރުން، އެ ގައުމުތަކުން އެނބުރި ދާ މީހުން ކަރަންޓީނުކުރަން ނިންމާފައިވާ ކަމަށެވެ.

ރެޑް ލިސްޓްގައި ގައުމުތައް ހިމެނީ ކޮވިޑްގެ ވޭރިއަންޓްތައް އުޅޭ ގައުުމުތައް ކަމަށް އޭނާ ވިދާޅުވި އެވެ. ކޮވިޑް ކޮންޓްރޯލް ކުރުމުގައި ކާމިޔާބީ ހޯދަމުން އަންނަ ގައުމުތައް އިނގިރޭސިވިލާތުން ލިސްޓްކޮށްފައި އޮންނަނީ ގްރީން ލިސްޓްގެ ގޮތުގަ އެވެ. އެއީ ރައްކާތެރިކަމުގެ ފިޔަވަޅުތަކާ އެކު ދަތުރުކުރެވޭނެ ގައުމުތަކެވެ. ރާއްޖެއަކީ ވެސް ކުރިން އެ ލިސްޓްގައި އޮތް ގައުމެކެވެ.

މިދިޔަ ހަފްތާއެއްހާ ދުވަހުގެ ތެރޭގައިި ރާއްޖޭން ކޮންމެ ދުވަހަކު އެ ބައްޔަށް ޕޮޒިޓިވްވާ މީހުންގެ އަދުދު ހުރީ 500 އަށް ވުރެ މަތީގަ އެވެ.