ފުލުހުންގެ އިސްވެރިންނާއި ރައީސް ބައްދަލުކުރައްވައިފި

ރައީސް މުހައްމަދު ނަޝީދަށް އަމާޒުކޮށް ބުރާސްފަތި ދުވަހުގެރޭ ދިން ޓެރެރިސްޓު ހަމަލާގެ ތަހުގީގާއި ގުޅޭ އެންމެ ފަހުގެ މައުލޫމާތު ހޯއްދެވުމަށް ރައީސް އިބްރާހީމް މުހައްމަދު ސާލިހު ފުލުހުންގެ މުއައްސަސާގެ އިސް ވެރިންނާއި ބައްދަލު ކުރައްވައިފިއެވެ.

ރައީސް އޮފީހުގެ ތަރުޖަމާން މަބްރޫކް އަޒީޒް ކުރެއްވި ޓްވީޓެއްގައި ވިދާޅުވީ ރައީސް ނަޝީދަށް އަމާޒުކޮށް ބުރާސްފަތި ދުވަހުގެރޭ ދިން ޓެރެރިސްޓް ހަމަލާގެ ތަހުގީގާއި ގުޅޭ އެންމެ ފަހުގެ މައުލޫމާތު ހޯއްދަވަން ރައީސް ސާލިހް ފުލުހުންގެ މުވައްސަސާގެ އިސްވެރިންނާއި ބައްދަލު ކުރައްވާފައިވާ ކަމަށެވެ.

މި ބައްދަލުވުމުގައި ކޮމިޝަނަރ އޮފް ޕޮލިސް މުހައްމަދު ހަމީދާއި ހޯމް މިނިސްޓަރ އިމްރާން އަބްދުﷲ ވަނީ ބައިވެރިވެވަޑައިގެންފައެވެ. މީގެ ކުރިން ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސީޕީ ހަމީދު ވިދާޅުވީ ހާދިސާ ހިނގި ސަރަހައްދުން ޝައްކު ކުރެވޭ 4 މީހަކު ފެނިފައިވާ ކަމަށެވެ.

ރައީސް ނަޝީދަށް އަމާޒުކޮށް ދީފައިވާ ހަމަލާގައި އެއްޗެއް ގޮއްވާލުމުގެ ސަބަބުން ލިބުނު ޒަޚަމްތަކަށް ރައީސް ނަޝީދު އަދިވެސް ގެންދަވަނީ އޭޑީކޭގައި ފަރުވާ ހޯއްދަވަމުންނެވެ. އޭޑީކޭއިން ބުނެފައިވަނީ އެމަނިކުފާނުގެ ސާޖަރީތަކެއް ކުރިއަށް ގެންދިޔަ ކަމަށާއި އެ ސާރޖަރީތައް ކާމިޔާބު ކަމަށެވެ.