ރައީސް ނަޝީދަށް ހަމަލާދިންކަމަށް ތުހުމަތު ކުރެވޭ މީހާ ހައްޔަރުކޮށްފި

ރައީސް މުހައްމަދު ނަޝީދަށް ހަމަލާދިން ކަމަށް ތުހުމަތު ކުރެވޭ މީހާ ހައްޔަރުކޮށްފި އެވެ. އެމީހާ ހައްޔަރުކޮށްފައިވަނީ މިއަދު ހެނދުނު ހުޅުމާލެއިންނެވެ.

ފުލުހުން އެ މީހާ ދެނެގަނެފައި ވަނީ އާންމުންގެ އެހީތެރިކަމާ އެކު އެވެ. އޭނާ ހޯދުމަށް އިއްޔެ ފުލުހުން ވަނީ ފޮޓޯވެސް އާންމުކޮށްފަ އެވެ. އޭނާ ހައްޔަރުކޮށްފައި ވަނީ ހުޅުމާލޭ ޣާޒީ ސްކޫލް ސަރަހައްދުގައި ހުންނަ ފްލެޓް 95 ޖީ 2 އިން ނެވެ.

އެ މައްސަލައާ ގުޅިގެން މީގެ ކުރިންވެސް ދެމީހަކު ހައްޔަރުކޮށްފައި ވެއެވެ. އެއީ މުޖާޒު އަހުމަދު، މއ. ފޭރުގެ 21އ. އާއި ތަހުމީން އަހުމަދު ފޮޅޭމާ، ގއ. ކޮނޑޭ، 32އ. އެވެ.

ތަހުމީން އަހްމަދަކީ ރައީސް ނަޝީދަށް ހަމަލާދިނުމަށް ބޭނުންކުރި އައިއީޑީ ހަރުކުރި ސައިކަލްގެ ވެރިފަރާތް ކަމަށް ފުލުހުން ބުންޏެވެ. އަދި މުޖާޒަކީ އެ ހަމަލާ ދިން ކަމަށް ތުހުމަތު ކުރެވޭ މީހާ އާ ސީދާ ގުޅުމެއް އޮތް މީހެއް ކަމަށްވެސް ފުލުހުން މައުލޫމާތު ދެއެވެ.

ފުލުހުން ބޭއްވި ނޫސްވެރިންގެ ބައްދަލުވުމުގައި ޕޮލިސް ކޮމިޝަނަރު ހަމީދު ވިދާޅުވީ މައްސަލައިގައި ހައްޔަރުކުރި ދެ މީހުންނަކީ ހަރުކަށި ފިކުރު ގެންގުޅޭ ބައެއް ކަމަށެވެ.