ފަހުން ޕޮޒިޓިވްވި ކޭސްތަކާ ގުޅިގެން ދަރިވަރުންނާއި ޓީޗަރުންގެ ސާމްޕަލް ނަގަނީ

ކުޅުދުއްފުށި ސިޓީން އިއްޔެ ޕޮޒިޓިވްވި ކޭސްތަކާއި ގުޅިގެން ސްކޫލެއްގެ ދަރިވަރުންނާއި ޓީޗަރުންގެ ސާމްޕަލް ނަގަން ނިންމައިފި އެވެ. އިއްޔެ ޕޮޒިޓިވްވެފައިވަނީ 34 އަހަރުގެ އަންހެނަކާއި އެމީހާގެ ދެ ކުދިންނެވެ.

ކޭއޯއަށް މަައުލޫމާތު ދެމުން އޮފިޝަލަކު ވިދާޅުވީ ޕޮޒިޓިވްވި ދެ ކުދިންގެ ތެރެއިން 1 ކުއްޖަކު އާދިއްތަ ދުވަހު ސްކޫލަށް ގޮސްފައިވާ ކަމަށެވެ. އެހެން ކަމުން އެކުއްޖާގެ ކްލާސް ކުދިންނާއި ޓީޗަރުންގެ ސާމްޕަލް މިރޭ ނެގުމަށް ހަމަޖެހިފައިވާކަމަށެވެ.

ފަހުން ކުޅުދުއްފުށިން ޕޮޒިޓިވްވި ކޭސްތަކާ ގުޅިގެން 8 ގެޔެއް މޮނީޓަރިންނަށް ލާފައިވާއިރު ޑައިރެކްޓް ކޮންޓެކްޓްގެ ގޮތުގައި ފާހަގަވި 15 މީހެއްގެ ސާމްޕަލް ނަގާފައިވާނެ ކަމަށް އޮފިޝަލު ވިދާޅުވި އެވެ. މީގެ އިތުރުން ރޭންޑަލް 8 ސާމްޕަލެއްވެސް ވަނީ ނަގާފަ އެވެ.

ކޮންޓެކްޓް ޓްރޭސިންގެ ތެރެއިން ނެގި އެއްވެސް ސާމްޕަލެއްގެ ނަތީޖާ އަދި މިހާތަނަށް ނުލިބޭކަމަށާއި ފަހުން ޕޮޒިޓިވްވި 3 މީހުންނަކީ ޓްރެވަލް ހިސްޓްރީ އޮތްބައެއް ނޫންކަމަށްވެސް ވިދާޅުވި އެވެ. އަދި މިހާތަނަށް އެމީހުން ޕޮޒިޓިވްވީ ކޮންބަޔަކާ ކޮންޓެކްޓް ވެގެންކަމެއް ދެނެގަނެވިފައިނުވާ ކަމަށްވެސް އޮފިޝަލު ވިދާޅުވި އެވެ.

ކުޅުދުއްފުށިން ޕޮޒިޓިވް ކޭސްތަކެއް ފެނިގެން މިމަހު 2 ވަނަ ދުވަހުވެސް މޮނީޓަރިންނަށް ލާފައެވެ. އެއަށްފަހު މޮނީޓަރިންގެ ހާލަތު އުވާލީ މިމަހު 8 ވަނަ ދުވަހުއެވެ.