ކުޅުދުއްފުށީގައި މާސްކް ނާޅައި އުޅުނު 23 މީހަކު މިއަދު ޖޫރިމަނާކޮށްފި

ކުޅުދުއްފުށި ސިޓީގައި މާސްކް ނާޅައި އުޅުނު 23 މީހަކު މިއަދު ޖޫރިމަނާކޮށްފި އެވެ. ރަށްރަށުގައިވެސް ބޭރުގައި އުޅޭ ވަގުތުތަކުގައި ރައްޔިތުން މާސްކް އެޅުމަށް އެޗްޕީއޭއިން އެންގި ނަމަވެސް ފަހަކަށް އައިސް ގިނަ ބަޔަކު މި ސިޓީގައި މާސްކް ނާޅައި އުޅޭކަން ފާހަގަކުރެވެ އެވެ.

އެޗްޕީއޭގެ ގައިޑްލައިންއާ ހިލާފުވާ ފަރާތްތައް ބަލައި ފިޔަވަޅު އަޅަން ޖެހެނީ ފުލުހުންނެވެ. އެޗްޕީއޭގެ ގައިޑްލައިން ކުޅުދުއްފުށީގައި ތަންފީޒުކުރުމުގައި ފުލުހުން ފަރުވާކުޑަކަމަށް ބުނެ ގިނަ ބަޔަކު ފާޑުކިޔަމުންދަނިކޮށް، މިއަދު މިވަނީ 23 މީހެއް ޖޫރިމަނާކޮށްފަ އެވެ.

ކުޅުދުއްފުށި ޓާސްކް ފޯސްގެ އޮފިޝަލު ކޭއޯއަށް ވިދާޅުވީ، 23 މީހުން ޖޫރިމަނާކޮށްފައިވަނީ މާސްކް ނާޅައި އުޅުމުގެ ސަބަބުން ކަމަށެވެ. މާސްކް ނާޅައި އުޅުމުގެ ސަބަބުން ޖޫރިމަނާކުރަނީ 1000 ރުފިޔާއިންނެވެ.

މުޅި ރާއްޖޭގައި ހަލުވިކަމާއެކު ކޮވިޑް-19 ފެތުރެމުންދާތީ ފިޔަވަޅުތައް ވަރުގަދަކޮށް ސަލާމަތީ ހިދުމަތްދޭ ފަރާތްތަކުގެ ދައުރު ފުޅާކުރުމަށް ރައީސުލް ޖުމްހޫރިއްޔާ ވަނީ އަންގަވައިފަ އެވެ.

ކުޅުދުއްފުށީގައި ކޮވިޑް-19 ހަ ކޭސް ފެނިފައިވާއިރު ބަލި ރަށުތެރޭގައި ފެތުރިފައި އޮވެދާނެކަމަށް ބަލައި ރައްކާތެރިކަމުގައި ފިޔަވަޅުތައް އެޅުމަށް ކޭއާރުއެޗުންވެސް ވަނީ އިލްތިމާސްކޮށްފަ އެވެ.