ހެރީއާއި މޭގަންއަށް އަންހެން ކުއްޖެ، ނަމަކީ ލިލިބެޓް ޑަޔާނާ

އިނގިރޭސިވިލާތުގެ ޕްރިންސް ހެރީ އާއި މޭގަންއަށް އަންހެން ކުއްޖަކު ލިބިއްޖެއެވެ. މޭގަން ވިހާފައިވަނީ ޖޫން 4 ވީ ހުކުރު ދުވަހު 11:40 ގައި ކެލިފޯނިއާގެ ސަންޓާ ބަރުބަރާ ކޮޓޭޖް ހޮސްޕިޓަލްގަ އެވެ.

މިއީ މި ދެމަފިރިންގެ ދެވަނަ ދަރިފުޅެވެ. ފުރަތަމަ ދަރިފުޅު އާޗީ ލިބުނީ 2019 ވަނަ އަހަރުއެވެ.

ދެވަނަ ދަރިފުޅަށް ނަން ކިޔާފައިމިވަނީ ކްއީން އެލިޒަބަތު އަދި ހެރީގެ މަންމަ ޕްރިންސެސް ޑަޔާނާގެ ނަމާއި ގުޅުވައިގެންނެވެ.

ހެރީއާއި މޭގަންގެ ފަރާތުން ނެރުނު ބަޔާނެއްގައި ވަނީ ލިލީ އުފަންވުމުން ވަރަށް އުފަލާއެކު އެ ދެމަފިރިން ލިލީއަށް މަރުޙަބާ ކިޔާފައިވާކަމަށެވެ. ލިލީ އުފަންވީއިރު ބަރުދަނުގައި ހުރީ 3.5 ކިލޯ ހުރިކަމަށާއި މިހާރު ދެމައިން ގެޔަށް ބަދަލުކޮށްފައިވާކަމަށްވެސް މި ބަޔާނުގައިވެއެވެ.

39 އަހަރުގެ މޭގަން އޭނާއަށް ދެވަނަ ކުއްޖަކު ލިބެން އުޅޭކަން އިޢުލާނު ކޮށްފައިވަނީ މާރިޗް މަހު އޮޕެރާ ވިންފްރީގެ ޝޯއަކަށް ދިން އިންޓަރވިއުއެއްގައެވެ.