އިންތިހާބުތަކުގައި އުތުރުން އެމްޑީޕީއަށް ދޭ ތާއީދާ އެއްވަރަށް ވެރިކަމުގައިވެސް އުތުރަށް ކުރިއެރުން އަންނަން ޖެހޭ: ޔާސިރު

އިންތިހާބު ތަކުގައި "އުތުރުން" އެމްޑީޕީއަށް ދޭ ތާއީދާއި އެއްވަރަށް، ވެރިކަމުގައިވެސް "އުތުރަށް" ކުރިއެރުން އަންނަން ޖެހޭކަމަށް ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުއްލަތީފް ވިދާޅުވެއްޖެއެވެ.

ޔާސިރު މިހެން ވިދާޅުވީ، ލޯކަލް ގަވަމެންޓް އޮތޯރިޓީ (އެލްޖީއޭ) ގެ ބޯޑުގައި ސިޓީ ކައުންސިލް ތަމްސީލުކުރުމަށް ފުވައްމުލަކު މޭޔަރު އިސްމާއިލް ރަފީގު އިންތިހާބުވުމާއި ގުޅިގެން އިއްސެއަށް މަރުހަބާ ދެންނެވުމަށް ކުރެއްވި ޓުވީޓެއްގަ އެވެ.

މާލޭ ސިޓީ ކައުންސިލްގެ މޭޔަރ ޑރ.މުހައްމަދު މުއިއްޒުއާ ވާދަކުރައްވައި އިސްމާއިލް ރަފީޤް ކާމިޔާބު ކުރެއްވީ 24 ވޯޓް ހޯއްދަވައިގެންނެވެ. މުއިޒަށް ލިބިވަޑައިގެންނެވީ 21 ވޯޓެވެ. މި އިންތިހާބުގައި އުތުރުން ބައިވެރިވެވުނީ ހަމައެކަނި އުތުރުގެ ސިޓީކަމުގައިވާ ކުޅުދުއްފުށީ ސިޓީ ކައުންސިލްގެ މެމްބަރުންނަށެވެ.

Congratulations @ismailrafeeq

Kulhudhuffushi City in @MDPSecretariat 7 - 0 @ProgressPartyMV

Inthihaabu thakugai “UTHURUN” MDP ah dhey thaeedhaa ehvarah, verikamugai ves “UTHURAH” kurierun annan jehey

Inthihaabugai “UTHURAH” dhekey huvafen hageegathakah vaan jehey pic.twitter.com/I444Lerr4W

— Yasir Abdul Latheef (@YasirLathyf) June 12, 2021

ޓުވީޓުގައި ޔާސިރު ވިދާޅުވީ ކުޅުދުއްފުށި ސިޓީއިން އެމްޑީޕީއަށް 7 ވޯޓު ލިބިފައިވާކަމަށެވެ. ޕީޕީއެމްއަށް އެއްވެސް ވޯޓެއް ލިބިފައެއް ނުވެއެވެ. ކުޅުދުއްފުށި ސިޓީގައި އަލަށް އިންތިހާބު ކުރެވުނު ކައުންސިލުގެ 7 ގޮނޑިއަށް އިންތިހާބުވެފައިވަނީ އެމްޑީޕީގެ މެންބަރުންނެވެ.

ޔާސިރުގެ ޓުވީޓުގައި އިތުރަށް ވިދާޅުވެފައިވަނީ އިންތިހާބުތަކުގައި އުތުރަށް ދެކޭ ހުވަފެން ހަގީގަތަކަށް ވާންޖެހޭ ކަމަށެވެ.

ރާއްޖޭގައި 4 ސިޓީ ކައުންސިލެއް އޮންނައިރު، ސިޓީ ކައުންސިލްތަކުގައި އެމްޑީޕީގެ 25 ކައުންސިލަރުން ތިއްބަވައެވެ. މީގެ އިތުރުން ޕީޕީއެމްގެ 18 ކައުންސިލަރުންނާއި ޖުމްހޫރީޕާޓީ އެއް ކައުންސިލް މެމްބަރު ހިމެނޭއިރު އަމިއްލަ 03 ކައުންސިލަރުން ތިއްބަވައެވެ.