މިޝްކާ މަރުގެ މައްސަލަ ތަހުގީގު ކޮށްދިނުމަށް އެޗްއާރުސީއެމުން ފުލުހުންގެ ކިބައިން އެދިއްޖެ

ފަރުވާ ލިބުން ލަސްވެ ކޮވިޑް-19ގެ ސަބަބުން ހާލު ސީރިއަސްވެގެން ރާއްޖޭން މި ބަލީގައި ނިޔާވި އުމުރުން އެންމެ ހަގު ކުއްޖާ، އުމުރުން އެންމެ 10 އަހަރުގެ މިޝްކާ މުހައްމަދުގެ މައްސަލަ ތަހުގީގު ކޮށްދިނުމަށް އެޗްއާރުސީއެމުން ފުލުހުންގެ ކިބައިން އެދިއްޖެ އެވެ.

"ރާއްޖެ ޓީވީ" ގެ ފަލަސުރުހީ ޕްރޮގްރާމުގައި އެޗްއާރުސީއެމްގެ މެމްބަރު މޫމިނާ ވަހީދު ރޭ ވިދާޅުވީ، މިޝްކާ ނިޔާވި މައްސަލަ ތަހުގީގު ކުރަން ބޭނުންވާ މުހިއްމު ބައެއް މައުލޫމާތުތައް އެ ކޮމިޝަނަށް އަދި ވެސް ނުލިބޭ ކަމަށެވެ. އޭގެ ތެރޭގައި، ހެލްތު މިނިސްޓްރީން ހެދި ރިވިއު ރިޕޯޓާއި އައިޖީއެމްއެޗުން ބޭނުންވާ އިތުރު ބައެއް މައުލޫމާތު ހިމެނެ އެވެ.

މޫމިނާ ވިދާޅުވީ ރިވިއު ރިޕޯޓު ވެސް ރަސްމީކޮށް އެޗްއާރުސީއެމާ ހިއްސާކޮށްފައި ނުވާ ކަމަށެވެ. ރައްޔިތުންގެ މަޖިލީހުގެ ކޮމިޓީއެއްގައި މީގެ ކުރިން ބޭއްވި ބައްދަލުވުމެއްގައި ރިޕޯޓު ފޮނުވާނެ ކަމަށް މިނިސްޓަރު އަހުމަދު ނަސީމް ވިދާޅުވިއަސް އެކަން ވެސް މިހާތަަނަށް ތަންފީޒު ނުކުރައްވާ ކަމަށް މޫމިނާ ވިދާޅުވި އެވެ.

ކޮވިޑަ-19 ގައި މިޝްކާގެ ހާލު ސީރިއަސްވެ ނިޔާވީ މި މަހުގެ ދެ ވަނަ ދުވަހުގެ ރެ އެވެ. އެ ކުއްޖާގެ ހާލު ސީރިއަސް ވާން ފެށުމުން އެމްބިއުލާންސް ފޮނުވައިދޭން އެތައް ފަހަރަކު އެދުމުން ވެސް އެކަން ކޮށްދީފައި ވަނީ ދެ ގަޑިއިރާއި 25 މިނެޓު ފަހުންކަން ހެލްތު މިނިސްޓްރީގެ ރިވިއުން އެނގެ އެވެ.

މިޝްކާގެ މަރުގެ މައްސަލަ ތަހުގީގު ކޮށްދިނުމަށް އެޗްއާރުސީއެމުން ފުލުހުންގެ ކިބައިން އެދުނީ މިދިޔަ ހަފުތާގަ އެވެ.