އެއް ރަށުން އަނެއް ރަށަށް ދަތުރުކުރުމުގެ ހުއްދަ ދީފި

ރާއްޖޭގެ އެއް ރަށުން އަނެއް ރަށަށް ދަތުރު ކުރުމުގެ ހުއްދަ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ދީފި އެވެ.

އެޗްޕީއޭއިން އެއް ރަށުން އަނެއް ރަށަށް ދަތުރު ކުރުން މަނާކޮށްފައި ވަނީ މިދިޔަ މަހުގެ ހަތަރު ވަނަ ދުވަހުއެވެ. ދަތުރު ކުރުން މަނާ ކުރީ އަތޮޅު ތެރޭގެ ރަށްތަކުގައިވެސް ކޮންޓްރޯލެއް ނެތި ކޮވިޑް ފެތުރެން ފެށުމުންނެވެ.

ރަށްރަށަށް ދަތުރުކުރުން މަނާކުރި ނަމަވެސް ޒަރޫރީ ބޭނުންތަކަށާއި، ސިއްހީ ފަރުވާ ހޯދުމަށް މީހުން ދިރިއުޅޭ އެއްރަށުން އަނެއް ރަށަށް ދަތުރުކުރެވެ އެވެ.

މިހާރު ކުރިއަށްގެންދާ ނޫސްވެރިންގެ ބައްދަލުވުމެއްގައި ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވީ، ގެސްޓް ހައުސްތައް ނެތް ރަށްތަކާއި، މޮނީޓަރިންގގައި ނެތް ރަށްތަކުގެ މެދުގައި ދަތުރު ފަތުރު ކުރުން ހުޅުވާލަން ނިންމާފައިވާ ކަމަށެވެ.

ނަމަވެސް މީގެ ކުރިންވެސް މޮނީޓަރިންގގައި އޮންނަ ރަށަކުން އަނެއް ރަށަށް ނުދެވޭ ގޮތަށް އޮންނަ އޮތުން އޮތީ ހަމަ އެގޮތަށެވެ. އަދި ގެސްޓް ހައުސް ހިންގާ ރަށަކަށް އަރާ ނަމަ، އޮންނަ އުސޫލުގެ ތެރެއިން ހުއްދަ ހޯދަން ޖެހެއެވެ.