މަޖިލީހުގެ އިންކުއަރީ ރިޕޯޓް ރައީސަށް އަދި ނުލިބޭ

ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާގައި މަޖިލީހުން ތައްޔާރުކޮށްފައިވާ އިންކުއަރީ ރިޕޯޓް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް އަދި ލިބިފައި ނުވާ ކަމަށް ރައީސް އޮފީހުން ބުނެފި އެވެ.

"އަވަސް"އަށް ދެއްވި އިންޓަވިއެއްގައި ރައީސް އޮފީހުގެ ތަރުޖަމާން މުހައްމަދު މަބްރޫކް އަޒީޒު ވިދާޅުވީ މަޖިލީހުން ފޮނުވަން ބުނި "އަން ސެންސާޑް" ރިޕޯޓް އަދި ރައީސް އަށް ލިބިފައި ނުވާ ކަމަށެވެ.

އިންކުއަރީ ރިޕޯޓް ރަސްމީކޮށް ލިބިފައި ނުވި ނަމަވެސް މަޖިލީހުގެ ވެބްސައިޓްގައި ކަމާ ގުޅޭ ރިޕޯޓެއް އާންމުކޮށްފައިވާތީ އެ ރިޕޯޓް ދިރާސާ ކުރައްވަމުން ގެންދަވާ ކަމަށް އޭނާ ވިދާޅުވި އެވެ. ނަމަވެސް ރިޕޯޓްގައި ބުނާ ކަންކަމަށް ފިޔަވަޅު އެޅުއްވުމާ ގުޅޭ ގޮތުން ވަކިއެއްޗެއް ވިދާޅުވެފައެއް ނުވެ އެވެ.

މަޖިލީހުގެ އިންކުއަރީ ރިޕޯޓް އާންމުކުރީ މިދިޔަ ބުރާސްފަތި ދުވަހުގެ އިރުއޮއްސެނިކޮށެވެ. މަޖިލީހުގެ އިންކުއަރީ ރިޕޯޓްގައި ރައީސް ނަޝީދަށް ހަމަލާ ދިނުމުގެ ކުރިން އެމަނިކުފާނާ މެދު ކަންތައްތައް ދިމާވަމުން ދިޔަ ގޮތާއި، ހަމަލާ ދިން ދުވަހު ކަންކަން ހިނގާދިޔަ ގޮތާއި، ހަމަލާގެ ފަހުން ކަންކަންވީ ގޮތް ވަރަށް ތަފްސީލްކޮށް ހިމަނާފައިވެ އެވެ.

އާންމުކޮށްފައިވާ ރިޕޯޓްގައި ވަނީ ބައެއް ބައިތައް ކަނޑާލާފަ އެވެ. ނަމަވެސް ސެންސަރު ނުކުރާ ނުވަތަ އެއްވެސް ބައެއް ނުކަނޑާ އޮތް ފުރިހަމަ ރިޕޯޓެއް ރައީސުލްޖުމްހޫރިއްޔާ އަށާއި، މަޖިލީހުގެ ރައީސްގެ އިތުރުން އުއްތަމަ ފަނޑިޔާރަށް ފޮނުވާނެ ކަމަށް މަޖިލީހުގެ އިދާރާ އިން ވަނީ ބުނެފަ އެވެ.