ކުމުންދޫ ނޭޗާރ ޕާރކްގައި ރައީސްގެ ދެ ކަނބަލުން ނެންގެވި ހިތްގައިމު ފޮޓޯ

ހދ ކުމުންދޫގެ ނޭޗާރ ޕާރކަށް ވަޑައިގެން ރައީސްގެ ދެ ކަނބަލުން ނެންގެވި ފޮޓޯއަށް ގިނަ ބައެއްގެ ސަމާލުކަން ހުއްޓިއްޖެ އެވެ. ހދ އަތޮޅުގެ ރަށްތަކަށް ރައީސް ކުރައްވަމުންގެންދަވާ ދަތުރުފުޅުގައި ކުމުންދޫއަށް ވަޑައިގެންނެވީ ހޮނިހިރު ދުވަހުގެ މެންދުރު ފަހުގެ ވަގުތެއްގައި އެވެ.

އެރަށަށް ވަޑައިގެން ރައީސްގެ ދެ ކަނބަލުން ވަނީ ނޭޗާރ ޕާރކަށް ޒިރާޔަތްކުރައްވައި ފޮޓޯ ނަގަންވާފަ އެވެ. ލަނކު ބުރިޖެއް މަތީގައި ހުންނަވައިގެން ނެންގެވި ހިތްގައިމު ދެ ފޮޓޯއެއް ވަނީ ރައީސް އޮފީހުން އާންމުކުރައްވާފަ އެވެ.

ފެހިކަން ގަދަ ގުދުރަތީ ހިތްގައިމު އެ ޕާރކްގެ ރީތިކަން ވަރަށް ފުރިހަމައަށް އެ ދެ ފޮޓޯއިންވެސް ފެނެ އެވެ. ރައީސްގެ ދެ ކަނބަލުންގެ އެ ޕޮޓޯތަކަށް ޝޯސަލް މީޑިއާގައި ގިނަ ބައެއްގެ ސަމާލުކަން ވަނީ ލިބިގޮސްފަ އެވެ.

ކުމުންދޫ ޒުވާނުންތަކެއް އިސްނަގައިގެން ހެދި މި ޕާރކް ހުޅުވާފައިވަނީ 2020 ވަނަ އަހަރުތެރޭގައި އެވެ. ރައީސް ސޯލިހް ކުމުންދޫއަށް ކުރެއްވި ދަތުރުފުޅުގައި ކުމުންދޫއަށް ކުރެއްވި ދަތުރުފުޅުގައި ކައުންސިލް މެމްބަރުންނާ ބައްދަލުކުރައްވައި އެރަށުގައި ކުރިއަށްދާ މަޝްރޫއުތަކާ ގުޅޭ ގޮތުން މަޝްވަރާކުރައްވާފަ އެވެ.

އެގޮތުން ކައުންސިލަރުން ވަނީ އެރަށުގެ ރައްޔިތުންނަށް މިވަގުތު ކުރިމަތިވެފައިވާ އެންމެ ދަތި އުނދަގޫ މައްސަލަތަކާ ބެހޭގޮތުން ރައީސްއާ ހިއްސާކުރައްވާފަ އެވެ. އަދި ކައުންސިލުން ވަނީ އެތައް އަހަރެއްގެ ތެރޭގައި ނުކުރެވޭހާ ގިނަ ތަރައްޤީގެ ކަންކަން ކުޑަދުވަސް ކޮޅެއްގެ ތެރޭގައި އެރަށަށް ހާސިލުވެފައިވާކަން މެމްބަރުން ފާހަގަކުރައްވާފައެވެ.

މީގެ އިތުރުން ރައްޔިތުންނަށް އެންމެ ދަތިވާ މައްސަލައެއްގެ ގޮތުގައި ކައުންސިލަރުން ފާހަގަކުރެއްވީ ރަށުގެ ބަނދަރަށް ވަދެ ނިކުމެ ވުމުގައި ހުރި ދަތިކަމުގެ މައްސަލަ އެވެ. އަދި، ބަނދަރު ބޮޑުކުރުމުގެ މަޝްރޫއާ ސިއްހީ ނިޒާމު އިތުރަށް ހަރުދަނާ ކުރުމާ ގުޅޭގޮތުންނާއި، ސްކޫލަށް ބޭނުންވާ ކަންކަމާއި، ރަށުގެ ވިޔަފާރިޔާ އިޖުތިމާއީ ކަންކަން ހަރުދަނާ ކުރުމަށް ކުރަންޖެހޭ ކަންކަމާ ގުޅޭގޮތުން ވެސް މި ބައްދަލުވުމުގައި މަޝްވަރާ ކުރެއްވި އެވެ. މި ބައްދަލުކުރެއްވުުގައި ރަށު ކައުންސިލުން ވަނީ ރަށުގެ މާސްޓަރ ޕްލޭންގެ ވީޑިއޯ ޕްރެޒެންޓޭޝަނެއް ހުށަހަޅާފަ އެވެ.

މި ބައްދަލުކުރެއްވުމުގައި އަންހެނުންގެ ތަރައްގީއަށް މަސައްކަތްކުރާ ކޮމިޓީއިން ފާހަގަކުރެއްވި ކަންތައްތަކުގެ ތެރޭގައި ރަށުގައި އަންހެނުންގެ ބަލިތަކަށް ހާއްސަ ޑޮކްޓަރެއް ނެތުމުން ދިމާވާ ދަތިތައް ވަނީ ފާހަގަކޮށްފަ އެވެ. އަދި، ރަށުގައި ދަނޑުވެރިކަންކުރާ އަންހެނުންނަށް، ދަނޑުތަކުން އުފައްދާ ތަކެތި މާކެޓް ކުރާނެ ގޮތްތަކެއް ފަހިކުރުމާއި ބެހޭގޮތުން ރައީސުލްޖުމްހޫރިއްޔާއާ މަޝްވަރާކުރައްވާފަ އެވެ.