ކުޅުދުއްފުށިން ވެކްސިން ފުރިހަމަކުރި މީހުންގެ އަދަދު ތިންހާހަށް އަރައިފި

ކުޅުދުއްފުށިން ކޮވިޑް-19 ވެކްސިން ފުރިހަމަކުރި މީހުންގެ އަދަދު 3،997 އަށް އަރައިފި އެވެ.

ކުޅުދުއްފުށީ ރީޖަނަލް ހޮސްޕިޓަލުން ބުނީ މިހާތަނަށް ކުޅުދުއްފުށިން ޖުމްލަ 9،418 މީހުން ވެކްސިން ޖަހާފައިވާކަމަށާއި އޭގެތެރެއިން 3،997 މީހަކު ދެ ޑޯޒް ފުރިހަމަކޮށްފައިވާއިރު ފުރަތަމަ ޑޯޒް ފުރިހަމަކޮށްފައިވަނީ 5،421 މީހުންނެވެ.

ރާއްޖޭގައި ފުރަތަމަ ދޭން ފެށި ކޮވިޝީލްޑް ވެކްސިންގެ ފުރަތަމަ ޑޯޒް ކުޅުދުއްފުށީގެ 5،110 މީހަކު ޖަހާފައިވާއިރު ކޮވިޝީލްޑްގެ ދެ ޑޯޒް ހަމަކޮށްފައިވަނީ 2،041 މީހެކެވެ. ފުރަތަމަ ޑޯޒްގެ ގޮތުގައި ކޮވިޝީލްޑް ޖެހި ފަރާތްތަަކަށް ދެ ޑޯޒްހަމަކުރަން މިހާރު ދެމުންގެންދާ އެސްޓްރާޒެނެކާ މިހާތަނަށް ޖަހާފައިވަނީ 1،778 މީހެކެވެ.

މިހާތަނަށް ކުޅުދުއްފުށިން ސައިނޮޕާމްގެ ފުރަތަމަ ޑޯޒް 311 މީހުން ޖަހާފައިވާއިރު ވެކްސިންގެ ދެ ޑޯޒް ހަމަކޮށްފައިވަނީ 178 މީހުންނެވެ.

ރާއްޖެއަށް ކޮވިޝީލްޑް ވެކްސިން ލިބިން ދަތިވެ ދެވަނަ ޑޯޒްހަމަނުވެ ތިބި ގިނަ ފަރާތްތަކަކަށް ވެކްސިން ދެވަނަ ޑޯޒްގެ ގޮތުގައި އެސްޓްރާޒެނެކާ ވެކްސިން ދޭން ފަށާފައިވަނީ މިމަހު 28 ވަނަ ދުވަހުއެވެ. އެ ހޮސްޕިތަލުން މީގެ ކުރިން ބުނެފައިވަނީ އެންމެންނަށް ޖެހޭ ވަރަށް ވެކްސިންގެ ސްޓޮކް ލިބިފައިވާކަމަށެވެ.