ވެކްސިން ފުރިހަމަކޮށްފައިވާ ފަރާތްތަކަށް ހިދުމަތްތައް ހޯދުމުގައި ލުއިތަކެއް ދެނީ

ވެކްސިން ފުރިހަމަކޮށްފައިވާ މީހުންނަށް ކޮވިޑްގެ ކުރިން އާންމު ހާލަތެކޭ އެއްގޮތަށް ސަރުކާރުގެ އޮފީސްތަކުން ހިދުމަތްދިނުމުގައި ލުއިތަކެއް ދިނުމަށް އަންނަނީ މަޝްވަރާކުރަމުންނެވެ.

"ސަން އޮންލައިން" އަށް ދެއްވި އިންޓަވިއުއެއްގައެއްގައި ސަރުކާރުގެ އޮފިޝަލަކު ވިދާޅުވީ ދެ ޑޯޒް ފުރިހަމަކޮށްފައި ތިބި ފަރާތްތަކަށް ސަރުކާރުގެ އޮފީސް ތަކުން ހިދުމަތް ހޯދާއިރު ހާއްސަ ފަސޭހަ ގޮތްތަކެއް ހަމަޖައްސައިދިނުމަށް މަޝްވަރާކުރަމުން ދާ ކަމަށެވެ.

އެގޮތަށް މަޝްވަރާކުރަން ނިންމީ އާންމު ހާލަތަށް ރުޖޫއަވުމުގައި ފަސޭހަތަކެއް ދިނުމުގެ ގޮތުންނާއި ވެކްސިން ޖެހުމަށް އިތުރު ހިތްވަރެއް ދިނުމުގެ ގޮތުންކަމަށް އެ އޮފިޝަލް ވިދާޅުވިއެވެ.

ސަރުކާރުންވަނީ ރާއްޖޭގެ އާބާދީގެ 90 އިންސައްތައަށް ވެކްސިން ޖެހުމަށް ހާއްސަ ކެމްޕެއިނެއް ފަށާފައެވެ.

ރާއްޖޭގައި ފުރަތަމަ ޖަހައިދެމުން ދިޔައީ ކޮވިޝީލްޑް ވެކްސިނެވެ. ނަމަވެސް އެ ވެކްސިން ހުސްވެ ސްޓޮކް ލިބުން ދަތިވެފައިވާތީ ފުރަތަމަ ޑޯޒްގެ ގެގޮތުގައި ކޮވިޝީލްޑް ޖެހި ފަރާތްތަކަށް ދެވަނަ ޑޯޒްގެ ގޮތުގައި މިހާރު ޖަހައިދެމުން އަންނަނީ އެސްޓްރާޒެނެކާ ވެކްސިނެވެ. މީގެ އިތުރުން ސިނޮފާމް ވެކްސިން އަދި ބައެއް ހާލަތްތަކުގައި ފައިޒާ ވެކްސިންވެސް ދަނީ ދެމުންނެވެ.