ފުވައްމުލަކަށް ދިމާވި ކަރަންޓުގެ މައްސަލައަށް ވަގުތީ ހައްލެއް ހޯދައިދީފި

ފުވައްމުލަކު ސިޓީއަށް ދިމާވި ކަރަންޓުގެ މައްސަލައަށް ވަގުތީ ހައްލެއް ފެނަކައިން ހޯދައިދީފި އެވެ. ފުވައްމުލަކުގެ ބޮޑު ބަޔަކުން ކަރަންޓާއި ފެނުގެ ހިދުމަތް ރޭ މެދުކެނޑުމުން ރައްޔިތުންނަށް އުދަނގޫތަކަކާ ކުރިމަތިލާން ޖެހުނެވެ.

އެރަށުގެ 80 ޕަސެންޓް ގެތަކުގައި ރޭ ކަރަންޓާއި ފެން ނެތްއިރު ފެނަކައިން ބުނީ އެކަން ހިނގީ ކަރަންޓުގެ ހިދުމަތް ދޭން ބޭނުންކުރާ ހައި ވޯލްޓޭޖު މައި ޓްރާންސްފޯމަރަށް ދިމާވި މައްސަލައަކުން ކަމަށެވެ.

ފުވައްމުލަކު ނެޓްވޯކްގައި ބޭނުންކުރަމުންދިޔަ 2500 ކޭވީއޭ ޓްރާންސްފޯމާއަށް ދިމާވި ޓެކްނިކަލް މައްސަލައަކާ ގުޅިގެން ކަރަންޓު ކެނޑުނުއިރު މިމައްސަލަ ހައްލުކުރުމަށް އައްޑޫ ސިޓީއިން ޓްރާންސްފޯމަރެއް ގެންދިއުމުގެ މަސައްކަތް އެކުންފުނިން ކުރަމުންދާކަމަށް ފެނަކައިން ބުނެ އެވެ.

Fuvahmulakah dhimaavi karantu massala ah mihaaru vaguthee halleh libifaivaa vaahaka dhannavan. Adhi, mivaguthu karantu beynunkurumugai kommehen beynun kuran jehey aalaithah beynunkurumah ilthimaas kuran.

— Fenaka Corporation Ltd (@TeamFenaka) August 2, 2021

މިމައްސަލަ ހައްލުކުރުމަށް ގާތްގަނޑަކަށް 12-10 ގަޑިއިރު ހޭދަވާނެ ކަމަށް އަންދާޒާކުރެވޭ ކަމަށް ފެނަކައިން ބުނިއިރު އެކުންފުނިން ވަނީ ކަރަންޓު ބޭނުންކުރުމުގައި ކޮންމެހެން ބޭނުންކުރަންޖެހޭ އާލާތްތައް ބޭނުންކުރުމަށް އިލްތިމާސްކުރައްވާފަ އެވެ.