ފުރަތަމަ ޑޯޒް ނުޖެހި ތިބި މީހުންނަށް އިތުރު ފުރުސަތެއް

ކޮވިޑް ވެކްސިންގެ ފުރަތަމަ ޑޯޒް ނުޖެހި ތިބި ފަރާތްތަކަށް ފުރަތަމަ ޑޯޒް ދިނުން ބުދަ ދުވަހު އޮންނާނެ ކަމަށް ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗު)ން ބުނެފި އެވެ.

ކޭއާރުއެޗުން ބުނީ ކޮވިޑް-19 އިން ދިފާއުވުމަށް ދެވޭ ވެކްސިންގެ ފުރަތަމަ ޑޯޒް ނުޖެހި ތިބި ފަރާތްތަކަށް ފުރަތަމަ ޑޯޒް ދިނުން މި ހަފްތާގެ ބުދަ ދުވަހު އަދި ސިނޮފާރމް ވެކްސިންގެ ދެވަނަ ޑޯޒް ދިނުން ބުރާސްފަތި ދުވަހު ކުރިއަށްގެންދެވޭނެ ކަމަށެވެ.

އެ ހޮސްޕިޓަލުން ވަނީ ކޮވިޑްގެ ބިރުވެރިކަން ރަށުގައި އޮތް ދުވަސް ވަރެއް ކަމަށް ވުމާއެކު ވެކްސިން ޖެހުމަށް ކުރިޔަށް ކިޔޫ ނުހެދުމަށް އިލްތިމާސްކޮށްފަ އެވެ. އަދި ހުމާއި ރޯގާގެ އަސަރު ހުރިނަމަ އެންމެންގެ ރައްކާތެރިކަމަށް ހޯލަށް ނުދިއުމަށްވެސް ވަނީ އެދިފަ އެވެ.

ހޮސްޕިޓަލުން އިތުރަށް ބުނީ ވެކްސިންޖެހުމަށް ކުރިޔަށް ކިޔޫ ނަމްބަރު ދޫކުރުމަށް ހަމަޖެހިފައި ނުވާކަމަށާއި ވެކްސިން ޖަހަން ބޭނުންވާ ފަރާތުގެ އައިޑީ ކާޑު ހިފައިގެން ހެނދުނު 10:00 އިން 12:00 އަށް އަފީފުއްދީން ސްކޫލް ހޯލަށް ދިއުމަށެވެ. އަދި ދެވަނަ ޑޯޒް ޖަހާ މީހުން ވެކްސިން ކާޑާއި އައިޑީ ކާޑު ހިފައިގެން ދިއުމަށެވެ.

އިތުރު މައުލޫމާތެއް ސާފު ކުރަން ބޭނުން ކަމުގައި ވާނަމަ ކޮވިޑް ހޮޓްލައިން 7606688 އަށް ގުޅުން ނުވަތަ އެސްއެމްއެސް ކުރެއްވުމަށް ވަނީ އެދިފަ އެވެ.