ސާފް ޗެމްޕިއަންޝިޕް ބާއްވަން ފުރުސަތު ލިބުމުން ރައީސް މަރުހަބާ ދަންނަވައިފި

2021 ވަނަ އަހަރުގެ ސާފް ޗެމްޕިއަންޝިޕް ބާއްވަން ފުރުސަތު ލިބުމުން އުފާވާކަން ހާމަކޮށް އެފްއޭއެމަށާއި މިކަން ކާމިޔާބުކުރަން މަސައްކަތްކުރެއްވި ހުރިހާ ފަރާތަތަކަށް ރައީސް އިބްރާހިމް މުހައްމަދު ސޯލިހު މަރުހަބާ ދަންނަވައިފި އެވެ.

މިއީ ބައިނަލްއަގްވާމީ މުބާރާތެއް ރާއްޖޭގައި ހޯސްޓްކުރާ ތިންވަނަ ފަހަރެވެ. މީގެ ކުރިން ރާއްޖެއަށް ސާފް ޗެމްޕިއަންޝިޕް ބާއްވަން ފުރުސަތު ލިބުނީ 2008 ވަނަ އަހަރު އަވައްޓެރި ސްރީލަންކާއާ ގުޅިގެންނެވެ. އެފަހަރުގެ ތަށި ވެސް ހިއްލާލީ ރާއްޖޭގެ ގައުމީ ޓީމުންނެވެ. އަދި އޭގެ ފަހުން 2014 ވަނަ އަހަރު އޭއެފްސީ ޗެލެންޖް ކަޕް ވެސް ރާއްޖެއިން ހޯސްޓްކުރި އެވެ.

އެންމެފަހުން 2018 ވަނަ އަހަރު ބޭއްވި ސާފް ޗެމްޕިއަންޝިޕްގެ ތަށި ވެސް ހިއްލާލީ ރާއްޖެއިންނެވެ. ރާއްޖެ އަކީ މިފަހަރުގެ ފޭވަރިޓުންގެ ތެރޭގައި ހިމެނޭނެ ޓީމެކެވެ.

ނޭޕާލާ ވާދަކޮށް ބައްދަލުވުމުގައި ބައިވެރިވި ހުރިހާ ގައުމެއްގެ ތާއީދާއެކު ރާއްޖެއިން މި ބިޑު މިވަނީ ކާމިޔާބުކޮށްފަ އެވެ.

ރައީސް އެފްއޭއެމަށާއި އެފްއޭއެމްއާއި ގުޅިގެން މިކަން ހާސިލުކުރުމަށް މަސައްކަތްކުރެއްވި ހުރިހާ ފަރާތްތަކަކަށް މަރުހަބާ ދެންނެވީ އެމަނިކުފާނު ކުރެއްވި ޓްވީޓެއްގަ އެވެ.

Exciting news! Maldives has been selected as the hosts for this year’s SAFF Football Championship to be held in October.

My congratulations to @MaldivesFA and others in the sports fraternity who worked hard to make this possible.

— Ibrahim Mohamed Solih (@ibusolih) August 9, 2021

މިފަހަރުގެ ސާފް ޗެމްޕިއަންޝިޕް ކުރިއަށް ގެންދިޔުމަށް ހަމަޖެހިފައި އޮތީ މިއަންނަ އޮކްޓޫބަރު މަހުގެ 1 ން 15 އަށެވެ.

ފީފާގެ ސަސްޕެންޝަނެއްގެ ދަށުގައި އޮތުމުން ޕާކިސްތާނަށް މިފަހަރުގެ މުބާރާތް ނުކުޅެވޭނެ އެވެ. ބޫޓާނުން ކުރިއަށް ދެދުވަހުގެ ތެރޭގައި ވަކިގޮތެއް އަންގާނެ ކަމަށް ބުނެފައިވާއިރު މިހާތަނަށް މުބާރާތުގައި ބައިވެރިވާނެ ކަމުގެ ޔަގީންކަންދީފައިވާ ގައުމުތަކަކީ ރާއްޖެ އާއި އިންޑިއާ، ނޭޕާލް، ބަންގްލަދޭޝް އަދި ސްރީލަންކާ އެވެ.