ފަތުރުވެރިކަމުގެ ދާއިރާގައި މަސައްކަތް ކުރާ 93 ޕަސެންޓު މީހުން ވެކްސިން ފުރިހަމަކޮށްފި

ފަތުރުވެރިކަމުގެ ދާއިރާގައި މަސައްކަތް ކުރާ 93 ޕަސެންޓު މީހުން ވެކްސިންގެ ދެ ޑޯޒް ފުރިހަމަކޮށްފައިވާ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސް ސޯލިހު ވިދާޅުވީ މިހާރު ދެވިފައިވާ ލުއިތަކާއެކު އިގްތިސާދީ ހަރަކާތްތައް ފެށިގެން ދިޔަ ދިޔުން އެގޮތުގައި ދެމެހެއްޓޭނީ ހުރިހާ ރައްޔިތުން ވެކްސިން ޖަހައިގެން ކަމަށެވެ.

މިހާރު ރާއްޖޭގެ 80 ޕަސެންޓު މީހުންވެސް މިހާރު ރާއްޖޭގައި ވެކްސިންގެ ފުރަތަމަ ޑޯޒް ޖަހާފައިވާއިރު 69 ޕަސެންޓު މީހުން ދެ ޑޯޒް ފުރިހަމަކޮށްފައިވާކަމަށް ރައީސް ވިދާޅުވިއެވެ. އަދި ފަތުރުވެރިކަމުގެ ދާއިރާ އަނބުރާ އިޔާދަކުރުމަށް ކުރި މަސައްކަތުގެ ނަތީޖާ މިހާރު ފެންނަމުންދާކަމަށެވެ.

ފަތުރުވެރިކަމުގެ ދާއިރާގައި މަސައްކަތް ކުރާ މީހުންގެ ތެރެއިން 93 ޕަސެންޓު މީހުން މިހާރު ވަނީ ވެކްސިން ޖަހާފައި ކަމަށާއި ބޯޑާ ކޮންޓްރޯލްގައި މަސައްކަތްކުރާ ހުރިހާ މުވައްޒަފުން މިހާރު ވަނީ ވެކްސިން ޖަހާ ނިންމާފައިކަމަށް ރައީސް ސޯލިހު ވިދާޅުވިއެވެ.