ފެނަކަ ހދ އަތޮޅުގެ މުވައްޒަފުންނަށް ޓްރެއިނިން ޕްރޮގްރާމެއް ބާއްވައިފި

ފެނަކަ ހދ އަތޮޅުގެ މުވައްޒަފުންނަށް އެ ކޯޕަރޭޝަނުން ހާއްސަ ޓްރެއިނިން ޕްރޮގްރާމެއް ބާއްވައިފި އެވެ. ފެނަކަ އިންސްޓިޓިއުޓް ފޯ ޓްރެނިންގ އެންޑް ރިސާޗްއިން ހދ. އަތޮޅުގައި އެ ސެޝަން ބާއްވާފައި ވަނީ ކުޅުދުއްފުށީފަ އެވެ.

އެ ސެޝަނުގައި ޓެކްނިކަލް އަދި އިލެކްޓްރިކަލް ދާއިރާއިން ޓްރެނިން ފޯރުކޮށްދީފައި ވެއެވެ. އަދި ޕްރެކްޓިކަލް ބައިގައި ވަޔަރު ކުރުމަށް ޓެސްޓުކޮށްފައި ވެއެވެ. ފެނަކައިން ބުނީ އެ ޓްރެނިންގ ޕްރޮގްރާމް ނިމުމުން ޕްރޮގްރާމްގެ ބައިވެރިންނަށް ސެޓިފިކެޓެއް ލިބިގެން ދާނެ ކަމަށެވެ.

އެއް ދުވަހުގެ މުއްދަތަށް ބޭއްވި އެ ސެޝަނުގައި ފެނަކައިގެ ކުޅުދުއްފުށީ ބްރާންޗުން ފަސް މުވައްޒަފުން ބައިވެރިވިއިރު، އެއަތޮޅުގެ އެހެން ކޮންމެ ބްރާންޗަކުން ދެ މުވައްޒަފުން ބައިވެރިވެފައިވެއެވެ. ނަމަވެސް މިވަގުތު މޮނީޓަރިންގެ ހާލަތުގައި އޮތުމުން މަކުނުދޫއާއި ނޭކުރެންދޫއިން މުވައްޒަފުންނަށް ބައިވެރިވެވޭގޮތް ވަނީ ނުވެފައެވެ.

މި ޕްރޮގްރާމް މި މަހުގެ 24 ވަނަ ދުވަހު ނ. ވެލިދޫގައި އެ ޕްރޮގްރާމް ބާއްވަން ހަމަޖެހިފައި ވާކަމަށާއި، ނ. އަތޮޅުގެ ހުރިހައި ބްރާންޗަކުން އެ ޕްރޮގްރާމްގައި ބައިވެރިވާނެ ކަމަށް ފެނަކައިން މައުލޫމާތު ދެއެވެ.