ވެކްސިން ފުރިހަމަ ނުކުރާ ފަރާތްތަކަށް މިއަދުން ފެށިގެން ގިނަ ދަތިތަކެއް

ކޮވިޑް-19 ވެކްސިން ދެ ޑޯޒް ފުރިހަމަ ނުކުރާ މީހުންނަށް މިއަދުން ފެށިގެން ގިނަ ހިދުމަތްތަކެއް ހޯދުމަށް ދަތިވެގެން ދާނެއެވެ. މިދިޔަ މަސްތެރޭގައި ސަރުކާރުން ވަނީ ވެކްސިން ފުރިހަމަ ނުކުރާ ފަރާތްތަކަށް ބައެއް ހިދުމަތްތައް ނުދޭން ހުއްދަ ދީފައެވެ.

އެގޮތުން ސަރުކާރުން ވަނީ އަޅާނެ ފިޔަވަޅުތައް އެކި ފަހަރުމަތިން ރައްޔިތުންގެ ސަމާލުކަމަށް ގެނެސްފައެވެ. މި ފިޔަވަޅުތައް މާލޭގެ އިތުރުން އަތޮޅުތެރޭގައިވެސް ތަންފީޒް ކުރާނެއެވެ.

ސަރުކާރުން އަޅަން ނިންމާފައިވާ ފިޔަވަޅުތަކަކީ:

~ ސްކޫލްތަކަށް ވަނުން މަނާކުރުން.

~ އޮފީސްތަކަށް ގޮސް މަސައްކަތްކުރުން މަނާކުރުން.

~ ޕަބްލިކް ޓްރާންސްޕޯޓްގެ ހިދުމަތް ހޯދުން މަނާކުރުން.

~ ކެފޭ ރެސްޓޯރަންޓުތަކުން ހިދުމަތް ހޯދުން މަނާކުރުން.

~ ސެލޫންތަކަށް ވަދެ ހިދުމަތް ހޯދުން މަނާކުރުން.

~ ވެކްސިން ފުރިހަމަ ނުކުރާ މީހުން ރަށްރަށަށް ގޮސް ކަރަންޓީނު ނިންމުމަށްފަހު ނަގާ ރިލީޒް ސާމްޕަލަށް ފައިސާ ދައްކަން ޖެހުން.

މީގެ އިތުރުން އޮފީސްތަކުން ދެމުން އަންނަ ބައެއް ހިދުމަތްތައްވެސް ވެކްސިން ފުރިހަމަ ނުކުރާ ފަރާތްތަކަށް ނުލިބޭނެއެވެ.

އާންމު ހާލަތަކަށް ރުޖޫއަވުމަށް ވެކްސިން ފުރިހަމަ ކުރުމަށްވެސް ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފައެވެ.