އަމާޒަކީ 2023ގެ ކުރިން މުޅި ރާއްޖެއަށް ލޯކަލް ޓޫރިޒަމް ފުޅާ ކުރުން

މީހުން ދިރިއުޅޭ ހުރިހާ ރަށަކަށް 2023 ވަނަ އަހަރު ނިމުމުގެ ކުރިން ގެސްޓްހައުސްއާއި ހޯމް ސްޓޭގެ ހިދުމަތް ފުޅާކުރުމަށް ޓަކައި މަސައްކަތް ކުރަމުން އަންނަ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ފަތުރުވެރިކަމަށް 50 އަހަރު ފުރޭތީ ބޭއްވި ކައުންޓްޑައުން އިވެންޓުގައި ވާހަކަ ދައްކަވަމުން ރައީސް ސޯލިހު ވިދާޅުވީ ސަރުކާރުގެ ސިޔާސަތަކީ މުޅި ރާއްޖެއަށް ފަތުރުވެރިކަން ފަތުރައިލުން ކަމަށެވެ.

ސަރުކާރުގެ ސިޔާސަތަކީ މުޅި ރާއްޖެއަށް ފަތުރުވެރިކަން ފަތުރައިލުން ކަމަށެވެ. އެކަން ކުރުމަށްޓަކައި ކޮންމެހެން ކުރަންޖެހޭ ވަރަށް މުހިންމު ކަންތައްތަކެއް އެބަހުރި ކަމަށާއި އެ ކަންކަން ކުރަމުން އަންނަ ކަމަށް ރައީސް ވިދާޅުވިއެވެ. އެގޮތުން ރައީސް ވިދާޅުވީ ރަށްރަށަށް ފަސޭހައިން ދަތުރު ކުރެވޭނެ އިންތިޒާމެއް ހަމަޖައްސަން ޖެހޭކަމަށާއި ހުރިހާ ރަށެއްގައި ޒަމާނީ މުވާސަލާތީ ހިދުމަތްތައް ތަރައްގީކޮށް، ސާފު ބޯފެނާއި ނަރުދަމާ ނިޒާމުވެސް ގާއިމް ކުރަން ޖެހޭކަމަށެވެ.

ރައީސް ވިދާޅުވީ ވައިގެ މަގުންނާއި ކަނޑު މަގުން ފަސޭހައިން ދަތުރު ކުރެވޭނެ ވިއުގައެއް ގާއިމު ކުރުމުގެ މަސައްކަތް މިހާރު ވެސް ކުރިއަށްދާ ކަމަށެވެ. އެގޮތުން ޑޮމެސްޓިކް ވައިގެ ބަނދަރުތައް އިތުރު ކުރަމުންދާ ކަމަށާއި ހަނިމާދުއާއި އައްޑޫގައި ބައިނަލްއަގްވާމީ ވައިގެ ބަނދަރު ތަރައްގީ ކުރަމުންދާ ކަމަށް ރައީސް ވިދާޅުވިއެވެ.

ރައީސް ސޯލިހު ވަނީ ފަތުރުވެރިކަމުގެ ސިނާއަތުގެ މޭސްތިރިންނަށާއި އިންވެސްޓަރުންގެ އިތުރުން އެ ސިނާއަތުގެ ހުރިހާ މުވައްޒަފުންނަށާއި މުވައްޒަފުންގެ އާއިލާތަކަށް ވަރަށް ހާއްސަ ޝުކުރެއް އަދާކުރައްވާފައެވެ.