ރާއްޖެއިން ބަންގްލަދޭޝާއި ނޭޕާލަށް ވެކްސިން ހަދިޔާކޮށްފި

ރާއްޖެއިން ބަންގްލަދޭޝާއި ނޭޕާލަށް އެސްޓްރަޒެެނެކާ ވެކްސިން ހަދިޔާކޮށްފި އެވެ.

ރައީސް އޮފީހުގެ ތަރުޖަމާނު މަބްރޫކް އަޒީޒް އަވަސް އަށް ވިދާޅުވީ ކޮންމެ ގައުމަކަށް ދެ ލައްކަ ޑޯޒްގެ ވެކްސިން ހަދިޔާކުރިކަމަށާއި ވެކްސިން ހަދިޔާކޮށްފައިވަނީ އިއްޔެ ކަމަށެވެ.

މަބްރޫކް ވިދާޅުވީ ވެކްސިން ހަދިޔާކުރި ނަމަވެސް ރާއްޖޭގެ ވެކްސިން ޖެހޭ އާބާދީއަށް ވާވަރަށް ވެކްސިން ހުންނާނެ ކަމަށެވެ. މިހާރު ވެކްސިން ޖެހޭ އާބާދީގެ ގިނަ މީހުން ވެކްސިން ފުރިހަމަކޮށްފައިވާ ކަން މަބްރޫކް ފާހަގަ ކުރެއްވި އެވެ.

މަބްރޫކް ވިދާޅުވީ މިދިޔަ އަހަރުން ފެށިގެން ކޮވިޑްގެ ބަލިމަޑުކަމުގެ ތެރޭގައި ރާއްޖެއަށް ގިނަ ގައުމުތަކަކުން އެހީވެފައިވާ ކަމަށެވެ. އެހެންކަމުން އެހެން ގައުމުތަކަށް ރާއްޖެއިން ވެސް ވެވޭނެ އެހީއެއް ފޯރުކޮށްދޭން ޖެހޭނެ ކަމަށް ވިދާޅުވި އެވެ.

މިހާތަނަށް ރާއްޖެއިން ވެކްސިން ފުރިހަމަކޮށްފައިވަނީ 343،149 މީހުންނެވެ.