ފުޅަދޫ އިންޖީނުގޭގެ މަސައްކަތް ނިމި ހިދުމަތްދޭން ފަށައިފި

ބ. ފުޅަދޫ އާ އިންޖީނު ގޭގެ ހުރިހާ މަސައްކަތެއް ނިމި ހިދުމަތްދޭން ފަށާފައިވާކަމަށް ފެނަކަ ކޯޕަރޭޝަނުން ބުނެފިއެވެ.

ފުޅަދޫގައި މީގެ ކުރިން ކަރަންޓުގެ ހިދުމަތް ދިނުމަށް ބޭނުން ކުރަނީ 160، 128 އަދި 80 ކިލޯވޮޓުގެ 3 ޖަނަރޭޓަރެވެ. އެހެން ނަމަވެސް އާ އިންޖީނުގެ ހުޅުވިގެން މިދިޔައީ، ކެޕޭސިޓީ އިތުރަށް ފުރިހަމަ ކުރުމަށްފަހު 250 ކިލޯވޮޓުގެ އާ އިންޖީނަކާއެކުކަމަށް ފެނަކައިން ބުނެއެވެ.

ފެނަކައިން ބުނީ ފުޅަދޫ އާ އިންޖީނުގޭގެ މަސައްކަތް ނިމި އެ އިންޖީނުގެއިން ރަށުގެ ރައްޔިތުންނަށް ކަރަންޓުގެ ހިދުމަތް އިއްޔެ ދޭން ފެށިފައިވާކަން އުފަލާއެކު ފާހަގަކުރާ ކަމަށެވެ. އަދި އާ އިންޖީނުގޭގައި އިންޖީން ރޫމާއި، ޕެނަލް ރޫމްގެ އިތުރުން އޮފީސް ބައެއްވެސް ހުންނާނެ ކަމަށާއި، މީގެ ކުރިން ދިމާވި އެތައް ކަމަކަށް އިންޖީނުގޭގެ ސަބަބުން ހައްލު ލިބިގެން ދާނެ ކަމަށެވެ.

ފެނަކައިން އަންނަނީ ރާއްޖޭގެ އެކި ހިސާބުތަކުގައި އެކުންފުނީގެ ހިދުމަތް އިތުރަށް ފުޅާ ކުރަމުންނެވެ. އަދި ރައްޔިތުންނަށް ފަސޭހަވާނެހެން ހިދުމަތް ދިނުމަށް އެކޯޕަރޭޝަނުން އަންނަނީ، ހާއްސަ އިސްކަމެއް ދީގެން މަސައްކަތްތަކެއް ކުރަމުންނެވެ.