ކުޅުދުއްފުށީގައި ބައިނަލްއަގުވާމީ ފެންވަރުގެ ސްޕޯޓްސް ކޮމްޕެކްސްއެއް ގާއިމުކުރާނަން: މަހުލޫފް

ކުޅުދުއްފުށި ސިޓީގައި ބައިނަލް އަގުވާމީ ފެންވަރުގެ އިންޑޯ ސްޕޯޓްސް ކޮމްޕްލެކްސްއެއް ގާއިމުކުރަން ނިންމާފައިވާކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.

ކުޅުދުއްފުށި ޒިގްޒެގް ދަނޑުގައި ޓާފް އަޅައިގެން ތަރައްގީކުރުމަށްފަހު އެ ދަނޑު ހުޅުވުމުގެ ގޮތުން ވާހަކަދައްކަވަމުން މިނިސްޓަރު މަހުލޫފް ވިދާޅުވީ، ބައިނަލް އަގުވާމީ ފެންވަރުގެ މެޗުތައް ކުޅެވޭވަރުގެ ވަރަށް ފުރިހަމަ އިންޑޯ ސްޕޯޓްސް ކޮމްޕްލެކްސްއެއް ކުޅުދުއްފުށީގައި ގާއިމުކުރުމަށް ނިންމާފައިވާ ކަމަށެވެ.

ރައީސްވެސް ބައިވެރިވެޑައިގެންނެވި މި ރަސްމިއްޔާތުގައި މަހުލޫފް ވިދާޅުވީ، މި ކޮމްޕްލެކްސްގައި ނެޓްބޯޅަ، ބާސްކެޓް ބޯޅަ، ހޭންޑްބޯޅަ އަދި ވޮލީބޯޅައިގެ ކޯޓްތައް ތަރައްގީކުރާނެކަމަށެވެ. އަދި މި މަސައްކަތް އިންޑިޔާގެ އެހީތެރިކަމާއެކު އަންނަ އަހަރު ފެށިގެންދާނެކަމަށްވެސް މިނިސްޓަރު ވިދާޅުވި އެވެ.

މަހުލޫފް ވިދާޅުވީ، ސިންތަޓިކް ޓްރެކްގެ މަސައްކަތްވެސް އަންނަ އަހަރު ގާއިމުކުރުމުގެ މަސައްކަތްވެސް ފެށިގެންދާނެ ކަމަށެވެ. އަދި މިއަދު ހުޅުވި ދަނޑު އިތުރަށް ތަރައްގީކުރުމަށް ރައީސް ވިދާޅުވެފައިވާ ކަމަށާއި އެގޮތުން އެ ދަނޑުގައި ލައިޓް ޖެހުމާއި ރެސްޓްރޮމް ހެދުމުގެ މަސައްކަތް ވަރަށް އަވަހަށް ފެށިގެންދާނެކަމަށް މިނިސްޓަރު ވިދާޅުވި އެވެ.

"ރައީސް ވިދާޅުވެއްޖެ ކޮންމެހެންވެސް މިރަށުގެ މިދަނޑުގައި ލައިޓާ ރެސްޓްރޮމްގެ މަސައްކަތް ފަށާދެއްޗޭ. އިރާދަކުރެއްވިއްޔާ ވީހާވެސް އަވަހަކަށް އެ މަސައްކަތް ފެށިގެންދާނެ. ހަމައެއާއެކީގައި ކޮރަލް ދަނޑުގެ ފެންސުގެ މަސައްކަތް ކުރިއަށްގެންދިޔުމަށް މިހާރު ވާނީ ކައުންސިލާ ހަވާލުކުރެވިފަ." މިނިސްޓަރު މަހުލޫފް ވިދާޅުވި އެވެ.