އީ-ޗެކިން ތައާރަފް ކޮށް، ކައުންޓަރުތަކުގެ އަދަދު އިތުރު ކުރަނީ

ވެލާނާ އިންޓަނޭޝަނަލް އެއާޕޯޓް (ވީއައިއޭ)ގައި އަންނަ އަހަރު އީ-ޗެކިން ތައާރަފް ކޮށް ޗެކިން ކައުންޓަރުތަކުގެ އަދަދު އިތުރު ކުރާނެ ކަމަށް އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު ގޯޑަން އެންޑްރޫ ސްޓުއާޓް ވިދާޅުވެއްޖެ އެވެ.

ގޯޑަން މިހެން ވިދާޅުވީ އިއްޔެ ރާއްޖެއަށް މި އަހަރުގެ އެއް މިލިއަން ފަތުރުވެރިޔާ އައުމާ ގުޅިގެން ބޭއްވި ހަފުލާގައި ވާހަކަފުޅު ދައްކަވަމުން ނެވެ.

އޭނާ ވަނީ އޭވިއޭޝަން އަދި ފަތުރުވެރިކަމުގެ ދާއިރާއަށް ބޮޑެތި ގޮންޖެހުންތަކެއް ކުރިމަތި ވެފައި އޮތް މި ދަނޑިވަޅުގައި ވެސް ރާއްޖެއިން ހޯދި ބޮޑު ކާމިޔާބީ ފާހަގަ ކުރަން ޖެހޭ ކަމަށް ވިދާޅުވެފަ އެވެ.

ކޮވިޑްގެ ކުރިން އެއާޕޯޓަށް މީހުން އައި މިންވަރަށް މިހާރު އަންނަން ފަށާފައިވާ ކަން ފާހަގަކުރައްވައި ގޯޑަން ވިދާޅުވީ ރާއްޖެއަށް އަންނަ މީހުންގެ އަދަދު އިތުރުވެ އެއާޕޯޓުގެ ޑިމާންޑު ވެސް ވަރަށް ބޮޑަށް މަތިވެފައިވާ ކަމަށެވެ.

އަންނަ އަހަރުގެ މެދުތެރޭގައި އީ ޗެކިންގެ ހިދުމަތް ތައާރަފްކޮށް ޗެކިން ކައުންޓަރުތަކުގެ އަދަދު އިތުރުކުރަނީ ވީއައިއޭގެ ހިދުމަތުގެ ފެންވަރު ރަނގަޅު ކުރަމުންގެންދާ މަސައްކަތްތަކުގެ ތެރެއިން ކަމަށްވެސް އޭނާ ވިދާޅުވެފައިވެ އެވެ.